وته‌بێژی هاوپه‌یمانی نێوده‌وڵه‌تی: داعش هه‌م چه‌كداری ماوه هه‌م پشتیوانی دارایی
كۆلۆنێل مایڵز كاگینس، وته‌بێژی هاوپه‌یمانی نێوده‌وڵه‌تی دژی داعش به‌كوردستان 24 ى رایگه‌یاند، له‌گه‌ڵ پێشمه‌رگه شانبه‌شانی یه‌كدی له دژی داعش شه‌ڕیان كردووه و هاوكاری پێشمه‌رگه‌بوونه له شه‌ڕی دژی رێكخراوه‌كه.
وته‌بێژی هاوپه‌یمانی نێوده‌وڵه‌تی دژی داعش وتیشی: پێشمه‌رگه هێزێكی ئه‌منی به‌هێزه‌و رێزێكی زۆرمان بۆی هه‌یه، دووپاتیشی كرده‌وه، راهێنانی پێشمه‌رگه به‌شێكه له ئه‌رك و پلانی مانه‌وه‌مان له‌م ناوچه‌یه‌و به‌رده‌وام ده‌بین له پاڵپشتیكردنی پێشمهرگهو ، پێكه‌وه به‌رده‌وام ده‌بین له شه‌ڕی دژ به داعش.
كۆلۆنێل مایڵز كاگینس، له‌باره‌ی ناوچه جێناكۆكان و بۆشاییه ئه‌منی و سه‌ربازییه‌كه‌ی نێوان پێشمه‌رگه و سوپای عێراق، كه داعش سوودی لێوه‌رگرتووه، وتی : ئێمه هه‌وڵمانداوه هه‌ردوولا زیاتر هه‌ماهه‌نگ بن و هه‌نگاوی باشیش نراوه، ئاشكراشیكرد، پێشمه‌رگه توانیان شوێنه‌كانی داعش ئاشكرا بكه‌ن له ناوچه جێناكۆكه‌كان و ئه‌و شوێنانه‌ی له نێوان پێشمهرگهو هێزه‌كانی عێراق بووه‌ته بۆشاییه‌ك و تیرۆریستان سوودی لێوه‌رده‌گرن.
جه‌ختی له‌وه‌ش كرده‌وه، كه گرنگه به شێوه‌یه‌كی جیهانی سه‌یری مه‌ترسییه‌كانی داعش بكرێت، به‌شێك له گه‌نجان كه په‌رته‌وازه‌بوونه و له خێزانه‌كانیان دابڕاون چوونه‌ته ریزی رێكخراوه‌كه و ئه‌وانیش ئه‌و دۆخه‌یان قۆستووه‌ته‌وه, به‌ڵام هاوپه‌یمانی نێوده‌وڵه‌تی له دژی چالاكییه‌كانی ئه‌و رێكخراوه به‌رده‌وام ده‌بێت.
له به‌شێكی دیكه‌ی وته‌كانیدا، كۆلۆنێل مایڵز كاگینس، رایگه‌یاند، له‌گه‌ڵ هێزه‌كانی سوریای دیموكرات په‌یوه‌ندیمان به‌هێزه‌و له‌گه‌ڵ یه‌كتر به‌رده‌وامین له رووبه‌ڕووبوونه‌وه‌ی داعش.
https://www.facebook.com/kurdistan24.official/videos/557748094960110/?t=0
