حکومەتی هەرێمی کوردستان پەرە بە پەیوەندیەکانی لەگەڵ وڵاتی لۆگزامبۆرگ دەدات
![](https://xwakurk.com/wp-content/uploads/2019/11/20191123_154157.jpg)
لە سەردانێکی فەرمیدا بۆ شاری لۆگزامبۆرگ، د. دلاوەر خالید ئاژگەیی، نوێنەری حکومەتی هەرێمی کوردستان لە یەکێتی ئەوروپا بە یاوەری شاندێکی نوێنەرایەتی سەردانی وەزارەتی دەرەوەی لۆگزامبۆرگی کرد و لەلایەن بەڕێز ئۆلیڤەر مائێس، بەرێوەبەری گشتی پەیوەندیە سیاسیەکانی وەزارەتی دەرەوەی لۆگزامبۆرگ و بەرپرسی بەشی ڕۆژهەڵاتی ناوەراست و باکووی ئەفریقیا پێشوازی لێکرا.
لە کۆبوونەوەیەکدا، د. دلاوەر ئاژگەیی لەگەڵ بەڕێز ئۆلیڤەر مائێس بە تێروتەسەلی بارودۆخی هەرێمی کوردستان و عێراق و ناوچەکەی شیکردەوە و دیدی حکومەتی هەرێمی کوردستانی لە سەر کۆی ڕووداوەکان خستەڕوو. باسی لە سیاسەتی نوێی حکومەتی هەرێم کرد بۆ باشترکردنی پەیوەندیەکان لەگەڵ بەغدا و پڕۆژەی چاکسازی و ڕیفۆرم و سیاسەتی پەرەپێدان بە ئابووری بەهێز و گرنگیدان بە کەرتی کشتوکاڵ و گەشتوگوزاری. داوای کرد لەم ڕووانەوە پەیوەندی دوولایەنە لە نێوان هەرێمی کوردستان و لۆگزامبۆرگ پەرەی پێبدرێت لە ڕێگەی وەزارەتی بازرگانی لۆگزامبۆگ و ژووری بازرگانی هەردوولا هەروەها دەرفەت بە کۆمپانیاکان بڕەخسێندرێت تاکو وەبەرهێنان لە هەرێمی کوردستان بکەن.
وەزارەتی دەرەوەی لۆگزامبۆرگ ئامادەیی وڵاتەکەی بۆ دروست کردنی پەیوەندی سیاسی، بازرگانی و ئابووری لەگەڵ هەرێمی کوردستان نیشاندا و بڕیاریاندا کۆبوونەوەی تایبەت لە نێوان هەردوولادا ئەنجام بدرێت.
لە بەشێکی تری کۆبوونەوەکە، د. دلاوەر ئاژگەیی باسی لە سیاسەتی دەرگا و دڵی کراوەی هەرێمی کوردستانی کرد بۆ ئاوارە و پەنابەران و سەرجەم پێکهاتە جیاوازەکان لە ناوچەکە بە گشتی، هەروەها باسی لە لێشاوی هاتنی زیاتر لە ١٦٠٠٠ پەنابەری نوێی سوری کرد بۆ ناو خاکی هەرێم، سەڕەڕای هەبوونی زیاتر لە ١ ملیۆن ئاوارەی ناوخۆیی عێراقی و پەنابەری سووری. هاوکات داوای هاوکاری و پشتگیری حکومەتی لۆگزامبۆرگی بۆ هەرێمی کوردستان کرد تاکو لە ڕێگەی ڕێکخراوە ناحکومیەکانەوە بە شێوەیەکی ڕاستەوخۆ هاوکاری پێشکەش بە پەنابەران بکات.
د. دلاوەر ئاژگەیی و بەڕێز ئۆلیڤەر مائێس تاوتوێی پرسێکی گرنگی تریان کرد ئەویش دروست کردنی پەیوەندی لە نێوان پەرلەمانی کوردستان و پەرلەمانی لۆگزامبۆرگ. لەم بارەیەوەش هەردوولا هاوڕابوون لەسەر ئەوەی کەوا پتەوکردنی پەیوەندی لە نێوان پەرلەمانی کوردستان و لۆگزامبۆرگ پەیوەندی هەردوولا بەهێزتر دەکات.
لۆگزامبۆرگ، ئەندامی یەکێتی ئەوروپا و ناتۆیە، پێشتر بەڕێز ئۆلیڤەر مائێس بە نوێنەرایەتی لۆگزامبۆرگ سەرۆکایەتی ئەنجومەنی ئاسایشی نەتەوە یەکگرتووەکانی لە ئەستۆ گرتووە و وەکو دیپلۆماتێکی سەرکەوتوو لە ناوەندە سیاسیەکان ناسراوە. جێگای ئاماژەیە وەزیری دەرەوەی ئەم وڵاتە دوو جار سەردانی هەرێمی کوردستانی کردووە.