دواین پێشكه‌وتنه‌كان له‌حه‌له‌ب
خواكوڕك
رۆژی سێ شه‌ممه 13/12/2016 ئه‌نجومه‌نی ئاسایش كۆبوونه‌وه‌ی له‌باره‌ی دواین پێشهاته‌كانی ره‌وشی حه‌له‌ب ئه‌نجامدا و تیایدا باڵوێزانی فه‌ره‌نسا و ئه‌ڵمانیا و ئه‌مریكا به‌تووندی هێرشیان كرده سه‌ر كرده‌وه‌كانی روسیا له‌م شاره.
له كۆبوونه‌وه‌كه‌دا باڵوێزی رووسیا رایگه‌یاند كه له ئێستادا حه‌له‌ب له %98 كه‌وتۆته ژێرده‌ستی هێزه‌كانی سوپای سوریا و ئه‌وه‌ی ماوه‌ته‌وه بڕیاره له‌گه‌ڵ توركیا ئاماده‌سازی بكرێت بۆ ده‌ربازبوونی خه‌ڵكه‌كه و پاشماوه‌ی هێزه‌كانی ئۆپۆزسیۆن به‌ره‌و ئه‌دلیب.
كاردانه‌وه‌كانی راپۆرته‌كه‌ی رووسیا له ناوه‌نده سیاسی و سه‌ربازیه‌كانی ئه‌وروپا و ئه‌مریكا كاردانه‌وه‌ی زۆری به‌دوای خۆی هێنا، و هه‌ریه‌كه له نه‌ته‌وه یه‌كگرتووه‌كان و رێكخراوی مافی مرۆڤی نێوده‌وڵه‌تی له‌مباره‌یه‌وه به‌یاننامه‌یان بڵاوكرده‌وه.
حه‌له‌ب ئه‌و شاره زیندووه‌ی به‌پایته‌ختی بازرگانی عه‌ره‌بی له رۆژهه‌لاتی ناوه‌راست ناوی ده‌ركردبوو، ئێستا به‌هۆی سیاسه‌ته‌كانی روسیا و ئێران بۆته وێرانه‌یه‌كی ناخ هه‌ژێن و جێگای سه‌رسوڕمانی جیهان.
هێرشه به‌رده‌وامه‌كانی سوریا به پاڵپشتی هه‌ریه‌كه له روسیا و ئێران له وه‌ته‌ی مانگی 11/2015 كه به‌سه‌دان تۆن ته‌قه‌مه‌نی به‌سه‌ر شاره‌كه به‌ردراوه‌ته‌وه، بۆته هۆكاری كوشتنی هه‌زاران هاوڵاتی مه‌ده‌نی و ژن و منداڵ، هه‌روه‌ها ئاواره‌بوونی ده‌یان هه‌زار كه‌سی دیكه.
