شاناز ئیبراهیم ئەحمەد هەوڵێك بۆ دواخستنی کۆنگرەی حزبەکەی ئاشکرا دەکات هۆشداری توندیدەدات
شاناز ئیبراهیم ئەحمەد هۆشداری لە ئەگەری دواخستنی كۆنگرەی یەكێتی دەدات و دەڵێت،”هیچ لایه‌نێك به رێگریكردن له به‌ستنی كۆنگره خۆی توشی رق و غه‌زه‌بی جه‌ماوه‌ری یه‌كێتی نه‌كات و به‌ده‌ستی خۆی دوا بزمار له تابوتی خۆی نه‌دات”
شاناز برایم ئەحمەد، بەرپرسی کۆمیتەی ڕێکخستنەکانی دەرەوەی یەکێتی و خوشکی هێرۆ برایم ئەحمەد، لە وتارێکیدا بەناونیشانی (دوا بزمار) ئاماژەی بەوە کرد، لە کاتێکدا تەنیا ٦ ڕۆژ بۆ بەستنی کۆنگرەی چوارەمی یەکێتی ماوە، ”تازە لێژنە بۆ چارەسەرکردنی هەندێک کێشە دادەندرێت“ کە دەگوترێت پەیوەندییان بە کەمیی ژمارەی بەشداربووانی ڕێکخستنەکانەوە هەیە.
خوشکەکەی هێرۆ برایم ئەحمەد رای گەیاندووە کە لە چەند ساڵی رابردوودا لەنێوخۆی حزبەکەیدا ”نادادپەروەرییەکی زۆر“ بەرامبەر بە یەکێتی کراوە، بەڵام دەستنیشانکردنی ڕۆژی کۆنگرە، ئومێدێکی بە ڕێکخستنەکانی حزبەکە داوەتەوە.
شاناز برایم ئاشکرای کردووە کە ترسی لە بڕیاری دواخستنی کۆنگرە هەیە و هۆشداری داوە کە ”ئەمجارە دواخستن و نه‌به‌ستنی كۆنگره به نادادپه‌روه‌ری لە قەڵەم نادرێت، به‌ڵكوو له مێژوودا به خیانه‌ت و تاوان ده‌ناسێنرێت“.
جەختیشی کردووەتەوە کە خەمی دووبارە دواخستنی کۆنگرە و نائومێدکردن و ساردکردنەوەی یەکێتییەکان دایگرتووە و ”خەم لە دووبارە یاریکردن بە هەست و سۆزی جەماوەری یەکێتی“ دەخوات.
بۆیە هیوای خواستووە، هیچ لایەنێک کە مەبەستی لێی باڵ و سەرکردەکانی حزبەکەیەتی، ”بە ڕێگریکردن لە بەستنی کۆنگرە، خۆی تووشی رق و تووڕەیی جەماوەری یەکێتی نەکات و بەدەستی خۆی، دوا بزمار لە تابووتی خۆی نەدات“.
