په‌رله‌مانی كوردستان سیفه‌تی به‌په‌له به پڕۆژه یاسای چاكسازی دا
دوای ئه‌وه‌ی ئه‌مڕۆ په‌رله‌مانی كوردستان له باره‌ی پڕۆژه یاسایی چاكسازی كۆبوویه‌وه له دانیشتنی یه‌كه‌می په‌رله‌مان به ده‌نگی 85 په‌رله‌مانتار سیفه‌تی به‌په‌له به پڕۆژه یاساكه درا بۆ ئه‌وه‌ی به‌ر له ده‌ست پێكردنی پشووی په‌رله‌مان پڕۆژه‌كه له په‌رله‌مان تێپه‌ڕێندرێت.
پێتشر ئومێد خۆشناو سه‌رۆكی فراكسیۆنی پارتی دیموكراتی كوردستان له په‌رله‌مانی كوردستان رایگه‌یاند بوو له باره‌ی په‌سه‌ندكردن و تێپه‌ڕاندنی یاسای چاكسازی كۆده‌نگیه‌ك له نێوان فراكسیۆنه به‌شداره‌كانی حكومه‌ت هه‌یه، بۆیه ئه‌مڕؤ. لە چوارچێوەی خوێندنەوەی یەكەم بۆ پڕۆژەیاسای چاكسازی سیفەتی بەپەلە بە پڕۆژەكە درا”.
بەگوێرەی بەرنامەی كاری دەستەی سەرۆكایەتی پەرلەمان لە تەوەری یەكەم دا، پەرلەمان خوێندنەوەی یەكەم بۆ پڕۆژه‌یاسای (چاكسازی له خانه‌نشینى و مووچه و ده‌رماڵه و به‌خشین و ئیمتیازاته‌كانى تر) دەكات، كە ھەفتەی رابردوو ئەنجوومەنی وەزیرانی ھەرێمی كوردستان پەسەندی كرد و ناردییە پەرلەمان.
تەوەرێكی دیكەی كۆبوونەوەكە، ده‌نگدانە له‌سه‌ر پێشنیازه‌یاسای (رێكلامی بازرگانی له هه‌رێمی كوردستان-عێراق).
ھەروەھا بڕیارە ھەر لە كۆبوونەوەی ئەمڕۆدا پەرلەمانی كوردستان خوێندنه‌وه‌ى دووه‌مى پڕۆژه‌یاسای (ماده‌هۆشبه‌ره‌كان و كارتێكاره عه‌قڵییه‌كان له هه‌رێمی كوردستان-عێراق) بكات.
