سه‌رۆكی هه‌رێمی كوردستان له‌باره‌ی دۆخی عێراق هاته ده‌نگ
به گوێره‌ی هه‌واڵێكی ماڵپه‌ڕی سه‌رۆكایه‌تی هه‌رێمی كوردستان، ئه‌مڕۆ شه‌ممه نێچیرڤان بارزانی، سه‌رۆكی هه‌رێمی كوردستان له راگه‌یه‌نراوێكدا ده‌ڵێت: به نیگه‌رانییه‌كی زۆر و له نزیكه‌وه چاودێریی دۆخی عێراق و پێشهاته‌كانی ده‌كه‌ین كه له قه‌یرانێكی قووڵدایه. له كاتێكدا مه‌ترسیی ناسه‌قامگیری و ئاڵۆزبوونی زیاتری دۆخه‌كه، خه‌ریكه وڵات به‌ره‌و داهاتوویه‌كی نادیار ده‌بات، ئه‌ركی هه‌مووانه به لێكگه‌یشتن و گیانێكی نیشتمانییانه‌ی به‌رپرسانه، مامه‌ڵه له‌گه‌ڵ دۆخه‌كه‌دا بكه‌ن و دوور له فشاری سیاسی، به میكانیزمه ده‌ستوورییه‌كان قۆناغه‌كه ده‌رباز بكرێت.
هه‌روه‌ها ده‌ڵێت:له بابه‌تی ڕاسپاردنی كاندیدی سه‌رۆك وه‌زیرانی داهاتووی عێراقدا، دیاره سه‌ركۆمار د. به‌رهه‌م ساڵح دوور له میكانیزم و بنه‌مای ده‌ستووری، كه‌وتووه‌ته ژێر فشارێكی زۆره‌وه. لێره‌دا دووپاتی ده‌كه‌ینه‌وه كه هه‌موو چاره‌سه‌رێك ده‌بێ له‌سه‌ر بنه‌مای ده‌ستوور و به‌پێی ڕێوشوێنه یاسایییه‌كان بێت.
ده‌شڵێت: به‌مه‌به‌ستی ده‌ستنیشانكردنی كاندیدێكی نیشتمانی بۆ سه‌رۆك وه‌زیران كه مایه‌ی مشتومڕ نه‌بێت و له‌لایه‌ن هێزه كاریگه‌ره‌كانه‌وه قبووڵكراو بێت، پێویسته داوا ڕه‌واكانی خۆپیشانده‌ر‌ان و دۆخ و به‌رژه‌وه‌ندییه‌كانی وڵات له ده‌ستنیشانكردنیدا ڕه‌وچاو بكرێن، هاوكاریی حكوومه‌تی ئاینده‌ش بكرێت بۆ تێپه‌ڕاندنی قۆناغی ئینتیقالیی داهاتوو و خۆئاماده‌كردن بۆ هه‌ڵبژاردنی تازه.
