چوار هەزار و 800 هاوڵاتی هەرێم ناویان بۆ فەریزەی حەج دیاریکرا

لە کۆی 72 هەزار و 202 ناو چوار هەزار و 800 کەس ناویان بۆ ئەنجامدانی فەریزەی حەج دیاریکرا.

شێخ قاسم بەرزنجی، بەڕێوەبەری گشتیی حەج و عومرە لە هەرێمی کوردستان، لە کۆنگرەیەکی ڕۆژنامەوانیدا ڕایگەیاند، ئەمساڵ پشکی سەرەکی هەرێمی کوردستان چوار هەزار و 800 کەسە و، ئەوەی دەمێنێتەوە تایبەتە بە خانەوادەی شەهیدان و لیژنە ئیدارییەکان ، 100 کەسی دیکەش تایبەتە بە وەزارەتی شەهیدان.

وتیشی ،ئەمساڵ دەرگای ناوتۆمارکردن نەکراوەتەوە ،تەنیا تیروپشک بۆ ئەو ناوانە پێشوو کراوە کە لە ساڵی 2017وە  ناویان تۆمارکراوە، لە داهاتوویەکی نزیکدا دەرگای ناوتۆمارکردن دەکەنەوە و ئەگەری هەیە  لەڕێگەی ئینتەرنێتەوە بێت و بە بەردەوامییش هەبێت.

سەبارەت بە پشکی پارێزگاکان، بەڕێوەبەری گشتی حەج و عومرە باسی لەوە کرد، پشکی پارێزگای هەولێر هەزار و 642 هاوڵاتیە، پارێزگای سلێمانی بە پارێزگای هەڵەبجە و ئیدارەی گەرمیانەوە هەزار و 915 هاونیشتمانییە و پارێزگای دهۆك هەزار و 142 هاوڵاتییە.