ڕاگەیەنراوێک لە سەرۆکایەتی هەرێمى کوردستانەوە
نێچیرڤان بارزانی سەرۆکی هەرێمی کوردستان لە ڕاگەیەندراوێکدا وێرای ئیدانەی هێرشی مووشەکی بۆ سەر باڵیۆزخانەی ئەمریکا لە بەغدا دەڵێت ، ئەم کردەوانە مەترسی زۆر جدی بەدوا دادێت و داهاتوی وڵات بەرەو دۆخێکی نەخوازراو دەبات .
دەقی ڕاگەیەندراوەکە
ئیدانەى ئەو هێرشە مووشەکییە دەکەین کە شەوى ڕابردوو باڵیۆزخانەى ئەمەریکاى لە بەغدا کردە ئامانج. ئەم کردەوانە مەترسیى ڕاستەقینە لەسەر دۆخ و سەقامگیرى و بەرژوەندیییەکانى عێراق دروست دەکەن، دووبارەبوونەوە و بەردەوامیشيان، لێکەوتە و ئەنجامى خراپیان بۆ سەر وڵات دەبێت.
پاراستنى ئاسایشى باڵیۆزخانە و نێردە دیپلۆماتییەکان ئەرکى لایەنە بەرپرسەکانە و نابێ ڕێگە بدرێت یاسا و ڕێسا نێودەوڵەتییەکان پێشێل بکرێن و دیپلۆماتکاران و نێردە دیپلۆماتییەکان بکرێنە ئامانج. دووپاتى دەکەینەوە کە نابێت عێراق بکرێتە گۆڕەپانى یەکلاکردنەوەى ململانێى هێزە هەرێمى و نێودەوڵەتییەکان.
نێچيرڤان بارزانى
سەرۆکى هەرێمى کوردستان
