ئەمڕۆ قۆناغى دووه‌مى رێگای نێوان گۆپاڵ بۆ رۆڤیا به رووی هاتووچۆی شوفێران ده‌كرێته‌وه
ئه‌ندازیار كامیران عه‌بدوڵلا به‌ڕێوەبه‌ری پڕۆژه‌ی درووستكردنی رێگای نێوان گۆپاڵ بۆ رۆڤیا بە ماڵپەڕی فەرمیی پارتی دیموكراتی كوردستانی راگه‌یاند ، ئه‌مڕۆ یه‌كشه‌ممه كاتژمێر 2ی پاشنیوه‌ڕۆ، به ئاماده‌بوونی به‌ڕێوەبه‌ری گشتیی رێگاوبان و، به‌ڕێوەبه‌ری فه‌ر‌مانگه‌ی رێگاو پرده‌كانی پارێزگای دهۆك و قایمقامی به‌رده‌ڕه‌ش و به‌ڕێوەبه‌ری شارەدێی رۆڤیا، قۆناغی دووه‌می رێگای نێوان گۆپاڵ بۆ رۆڤیا كه 12 كم دەبێت، به رووی هاتووچۆی شوفێران ده‌كرێته‌وه.
كامیران عه‌بدوڵلا راشیده‌گه‌ێنێت ، به كردنه‌وه‌ی ئه‌و به‌شه‌ش، ده‌بێته 17كم كه ده‌كرێته‌وه و، ته‌نیا 5 كم دیکە ده‌مێنێت، ئه‌ویش ته‌واو ده‌كرێت.
ده‌شڵێت ، ئه‌و پڕۆژه ستراتیژییه له نێوان دوو شاره، كه دهۆك و هه‌ولێره و گرینگییه‌كی زۆری بۆ كه‌مكردنه‌وه‌ی كات و رووداوی هاتووچۆ دەبێت، چونكه رێگاكه فرا‌وان و دوو سایده.
پڕۆژه‌ی درووستكردنی رێگای جووت سایدی نێوان رۆڤیا بۆ گۆپاڵ، به پڕۆژه‌یه‌كی ستراتیژی نێوان شاری دهۆك و هه‌ولێر هه‌ژمار ده‌كرێت، کە له‌لایه‌ن كۆمپانیای كاڤین گروپ جێ به‌جێ ده‌كرێت، 22 كم رێگای سه‌ره‌كیه و له 7 ئۆڤه‌رپاس و 90 قه‌نته‌ره پێكدێت، 15 كم یش رێگای كاتییه، پێشتر له 18 ی 9 ی 2019 به‌شێكی رێگاكه كه 5 كم بوو، به رووی هاتووچۆی هاووڵاتیان کرابووەوە.
