فازڵ میرانی: كەس ناتوانێ لە بەغداوە وەزیر بۆ كورد دیار بكات
سکرتێری مەکتەبی سیاسیی پارتی دیموکراتی کوردستان جەختی کردەوە کە دەبێت کورد خۆی ناوی وەزیرەکانی لە کابینەی تازەی حکوومەتی عێراق دەستنیشان بکات.
فازڵ میرانی، سكرتێری مەكتەبی سیاسیی پارتی، لە پرێس کۆنفرانسێکدا ئەو زانیارییانەی پشتڕاست کردەوە کە باس لە سەردانی شاندێکی حزبە کوردستانییەکان بۆ بەغدا و کۆبوونەوەیان لەگەڵ لایەنە سوننی و شیعییەکان دەکەن.
ڕوونیشی کردەوە کە ئەوان وەکوو پارتی دیموکراتی کوردستان، هەوڵیان داوە، درز نەکەوێتە نێوان لایەنە کوردستانییەکان.
سكرتێری مەكتەبی سیاسی پارتی دیموكراتی كوردستان، ئاماژەی بەوەشكرد: كەس ناتوانێ لە بەغدا وەزیر بۆ لایەنە كوردستانییەكان دیار بكات، بەڵكو دەبێ خۆمان ناوەكانیان پێبدەین و بڵێین ئەمانە وەزیری كوردن.
