ده‌قی ئه‌و بڕیارانه‌ی له كۆبوونه‌وه‌ی نێوان وه‌زیری ناوخۆ و پارێزگاری هه‌ولێر دران
ئه‌مڕؤ چوارشه‌ممه به مه‌به‌ستی گرتنه به‌ری رێوشوێنی توندر بۆ رووبه‌روووبوونه‌وه‌ی ڤایرۆسی كۆرۆنا له باره‌گای ئه‌نجومه‌نی پارێزگای هه‌ولێر به ئاماده‌بوونی وه‌زیری ناوخۆی حكومه‌تی هه‌رێم، و فرسه‌ت سۆفی پارێزگای هه‌ولێر کۆبوونەوەیەکی فراوان لەگەڵ هەر (10) قائیمقامی قەزاکانی سنووری پارێزگای هەولێر و زۆربەی بەڕیوبەرایەتییە گشتییەکان و فەرمانگە پەیوەندییدارەکان و پۆلیس و ئاسایش سازکرا، لەکۆبوونەوەکەدا ئەم خاڵانەی لای خوارە بڕیاریان لەسەر درا.
1- جەخت کردن و پابەندبوون بەسەرجەم بڕیارەکانی کۆبوونەوەی ئەنجوومەنی وەزیران لە رۆژی 2020.2.25 تایبەت بە رێوشوێنەکانی خۆپارێزی لە نەخۆشی کۆرۆنا، هەروەها جێبەجێکردنی سەرجەم بڕیارەکانی وەزارەتی ناوخۆ و وەزارەتی تەندروستی لە کۆبوونەوەی رۆژی 2020/2/22 کە بڕیاریان لەسەر درابوو، هەرکەس و لایەنێک سەرپێچی بکات رووبەڕووی لێپرسینەوە دەبێت.
2- سەرجەم قائیمقامیەتەکانی سنووری پارێزگای هەولێر راسپێردران کە دەبێ بەهەموو توانایانەوە چاودێری بازاڕ و کاڵاکان و کەل و پەلی پزیشکی و سوتەمەنی بکەن، هەرکەسێک بیەوێت بازاڕ ئیستغلال بکات دەبێ رێکاری یاسایی توند بەرامبەری بگیرێتەبەر.
3- هەتا کاتێکی نادیار سەرجەم ئەو گروپە گەشتیاریانە رادەگیرێت کە بە ئامانجی گەشتیاری لە پارێزگاکانی عێراق دێنە هەرێمی کوردستان.
4- یادکردنەوەی بۆنەکانی ئادار و ئازادی و نەورۆز بەشێوەی مەراسیم و ئاهەنگ و ڤیستیڤاڵ رادەگیرێت، هەروەها ئەو شوێنانەی ئاهەنگی شەوانە سازدەکەن رادەگیرێت.
5- لە رۆژی 2020.2.28 بەدواوە تا کاتێکی نادیار لەسەرجەم کافتریا و شوێنە بازرگانییەکان نێرگەلە قەدەغە دەکرێت، هەروەها بۆسەلامەتی هاووڵاتیان شوێنەکانی مەساج و سینەماکان نابێ کاربکەن، هەروەها دەبێ سەنتەرەکانی وەرزش و لەش جوانی و گه‌رماو و مەلەوانگەکان پەیڕەوی تەواوی ئەو رێنماییانە بکەن کە لەلایەن بەڕێوەبەرایەتی گشتی تەندروستی هەولێر پێیان دەگەن، بە پێچەوانەوە دادەخرێن. هەروەها دەبێ هاووڵاتیان لەم ماوەیە خۆیان بپارێزن لەسەردانیکردنی بازاڕی ئاژەڵ و پەلەوەران.
6- سەبارەت بە مەراسیم و پرسە و بۆنە ئاینیەکان داواده‌كه‌ین له وەزارەتی ئەوقاف و كاروباری ئاینی و یەکێتی زانایانی ئاینی رێکاری گونجاو بگرنەبەر بۆ پارێزگاریکردن لە تەندروستی هاووڵاتیان.
7- سەبارەت بە کەمپەکانی پەنابەران و ئاوارەکان کۆبوونەوە رێوشوێنی پێویستی داناوە و دەبێت دەست بەجێبەجێکردنی بکرێت.
8- سەرجەم فەرمانگەکان رادەسپێرین کە قەڵەباڵغی لەدام و دەزگاکان کەمبکرێتەوە و داواش لە هاووڵاتیانی دەکەین بۆ ئەم مەبەستە هاوکاربن و روونەکەنە شوێنە قەڵەباڵغەکان و تا بکرێت ئەم ماوەیە خۆیان لەسەردان و سەفەر بۆ شارەکان ببپارێزن، هەروەها سەردانی نەخۆش جگە لە یاوەر لەگەڵ نەخۆش بەهەموو شێوەیەک قەدەغەیە.
9- بۆسەرجەم بازگەکانی سنووری هەولێر لەگەڵ موسڵ و کەرکوک تیمی تەندروستی و پێداویستی پشکنین دابین دەکرێت و دەبێ رێوشوێنی پێویست بگیرێتەبەر.
10- لەسەر ئاستی پارێزگا و هەروەها لەسەر ئاستی هەر (10) قەزایی سنوری پارێزگای هەولێر ژووری عەمەلیات پێک دەهێنرێت و دەبێ رۆژانە کۆبوونەوە بکرێت و هەموو رێکارێک بگیرێتەبەر لە پێناو خۆ پارێزی لەم نەخۆشییە و پاراستن و سەلامەتی هاووڵاتیانی شارەکەمان. دەبێ لەم ماوەیەدا بەجدی تر و چڕو پڕتر چاودێری پاک و خاوێنی رێستورانت و چێشتخانە و هوتێل و موتێل و شوێنە گشتییەکان بکرێت.
هاووڵاتیانی شارەکەمان دڵنیا دەکەینەوە شەو رۆژ دەخەینە سەر یەکتر بۆ پارێزگاری لە تەندروستی گشتی.
راگەیاندنی پارێزگای هەولێر
