وه‌زیری شاره‌وانی: لەم ساڵدا نزیكەی 35 پرۆژەی ستراتیژی جێبەجێ دەكرێن
وەزیری شارەوانی و گەشتوگوزاری حكوومەتی هەرێمی كوردستان رایگەیاند، لە ساڵی 2020 نزیكەی 35 پڕۆژەی گەورە و ستراتیژی كە ئەولەویەت بۆ ئاوی خواردنەوەن، جێبەجێ دەكرێن و بڕیاری ئەنجومەنی وەزیرانیش بۆ دابینكردنی بودجەی پێویست بۆ تەواوكردن و جێبەجێكردنی پرۆژەكان دەرچووە.
ساسان عەونی، وەزیری شارەوانی و گەشتوگوزاری حكومەتی هەرێمی كوردستان، سەبارەت بە ژمارەی پڕۆژەكانی وەزارەت، رایگەیاند: وەزارەتی شارەوانی و گەشتوگوزار ژمارەیەكی یەكجار زۆر پڕۆژەی هەن، كە بەشێك لەو پڕۆژانە پرۆژەی بەردەوامن.
وەزیری شارەوانی و گەشتوگوزار سەبارەت بە پلانی حكومەت بۆ جێبەجێكردن و تەواوكردنی پڕۆژەكان، وتی: “لە پلانی ساڵی 2020، ئەنجومەنی وەزیرانی هەرێمی كوردستان و وەزارەتی پلاندان، بڕیاری دابینكردنی بودجەی پێویستییان بۆ نزیكەی 35 پڕۆژە داوە، كە ئەولەویەتی ئەو پڕۆژانەش بۆ پڕۆژەكانی ئاوی خواردنەوەن و هەروەها پڕۆژەكانی دیكەی ژێرخانیش وەك تۆڕێكی شەقام لەناو شار و شارۆچكەكان و هەندێك خزمەتگوزاری دیكەش كە بۆ هاوڵاتییان پێویستن”.
سەبارەت بە جۆر و شوێنی جێبەجێكردنی پڕۆژەكانیش، وەزیری شارەوانی و گەشتوگوزار، دەڵێت: “ئەوەی كە ئەولەویەتی لە پڕۆژەكان وەرگرتووە، تەواوكردنی پڕۆژە گەورەكان و پڕۆژە ستراتیژییەكانی ئاوی خواردنەوەن كە هەموو شار و شارۆچكەكانی كوردستان دەگرنەوە”.
