وەزیری ناوخۆ زیان لێکەوتووانی لافاوەکەی دهۆك بەسەر دەکاتەوە
وەزیری ناوخۆی حکوومەتی هەرێمی کوردستان بە راسپاردەی سەرۆکی حکوومەتی هەرێمی کوردستان، زیان لێکەوتووانی لافاوەکەی دهۆک بەسەر دەکاتەوە.
ئەمڕۆ هەینی 20-3-2020، رێبەر ئەحمەد، وەزیری ناوخۆی حکوومەتی هەرێمی کوردستان لەگەڵ فەرهاد ئەتروشی، پارێزگاری دهۆك کۆ بووەوە.
وەزیری ناوخۆ لەبارەی لە نزیکەوە چاودێریکردنی رێکارەکانی رووبەڕووبوونەوەی ڤایرۆسی کۆرۆنا و قەرەبووکردنەوەی زیانلێکەوتوانی لافاوەکەی چەند رۆژی رابردوو دهۆک گەیشتووەتە ئەو شارە کە سەرۆکی حکومەت دوو ملیار دیناری بۆ قەرەبووکردنەوەیان تەرخانکردبوو.
بەهۆی لافاو و بارانی زۆری چەند رۆژی رابردوو، زیاد لە 400 خانوو و دەیان ئۆتۆمبێل لە دهۆک و زاخۆ زیانیان پێگەیشت، بەو هۆیەوە، مەسرور بارزانی، بڕی دوو ملیار دیناری وەک یارمەتی بۆ زیانلێکەوتووان لە دهۆک و زاخۆ خەرج کرد.
هەروەها، دوێنی پێنجشەممە، یەکەم حاڵەتی ڤایرۆسی کۆرۆنا لە دهۆک تۆمارکرا کە کەسێک بوو لە دەرەوەی وڵات گەڕابووەوە شارەکە.
