یه‌كێتی زانایانی ئایینی ئیسلامی كوردستان په‌یامێك ئاراسته‌ی هاوڵاتیان ده‌كات
یه‌كێتی زانایانی ئایینی ئیسلامی كوردستان په‌یامێكی پێنج خاڵیی بۆ خۆپاراستن له ڤایرۆسی كۆرۆنا ئاراسته‌ی هاوڵاتیان كرد و له خاڵێكدا “ئارامی و دان به‌خۆداگرتن” به‌پێویست ده‌زانێت و ده‌ڵێت روبه‌ڕوبونه‌وه‌ی ڤایرۆسه‌كه به‌رپرسیارێتییه‌كی هاوبه‌شی هه‌مووانه.
ئەمڕۆ چوارشەممه، لە پەیامێكی یەكێتی زانایانی كوردستاندا هاتووە، لەم دۆخەدا پێویستە ددان بەخۆماندا بگرین و بەئارامی و هیمەتبەرزی و ئومێدەوە لە ئایندە بڕوانین.
ڕوون كراوەتەوە، بۆ مسوڵمانان زۆر گرنگە ماوەی مانەوەمان لە ماڵ بكەینە وێستگەی بەخۆداچوونەوە و رامان و راستكردنەوەی نیەت و كردارمان لەگەڵ خوای گەورە، هەروەها لەم كاتەدا وەك هەڵمەتێكی رۆحی و ئیمانی پێویستە بەردەوام نزای خێر بۆ سەلامەتی و دەفعی بەڵا و نەخۆشی و ناخۆشی لەسەر كوردستان بكەین.
لە پەیامەكەی یەكێتی زانایان ئەوەش هاتووە، رووبەڕووبوونەوەی مەترسی ڤایرۆسی كۆڕۆنا بەرپرسیارییەتێكی هاوبەشە و پێویستە هەمووان هاوكار بین بۆ تێپەڕاندنی ئەو دۆخە، هەروەها جێبەجێكردنی رێنوێنییە تەندروستی و تەناهی و ئیدارییەكان ئەركێكی هەرە پێویستی ئەم قۆناغەیە.
ئەو پەیامەی یەكێتی زانایانی كوردستان لە كاتێكدایە ڤایرۆسی كۆرۆنا بەفراوانی بڵاو بووەتەوە و حكوومەت بۆ پاراستنی هاووڵاتییان سەرجەم ڕێكارەكانی گرتووەتەبەر.
