هه‌رێمی كوردستان په‌یامێك ئاراسته‌ی به‌غدا ده‌كات
دوای ئه‌وه‌ی لایه‌نه شیعه‌كان له باره‌ی كاندید كردنی عه‌دنان زورفی نه‌گه‌شیتنه رێككه‌وتن، نێچیرڤان بارزانی، سەرۆکی هەرێمی کوردستان لە راگەیێندراوێکدا ئاماژە بەوە دەکات، سەرۆکایەتیی هەرێمی کوردستان لە روانگه‌ی باوەڕی بە سەقامگیریی سیاسی و ئەمنیی عێراق و ئامادەیی بۆ كاری جددی، پشتیوانی مستەفا كازمی بۆ پۆستی سەرۆکوەزیرانی عێراق دەکات.
دەقی راگەیێندراوی سەرۆکی هەرێمی کوردستان:
ڕاگه‌یه‌نراوێک له سه‌رۆکی هه‌رێمی کوردستانه‌وه
ئەم دۆخە سەخت و دژوارەی وڵاتە ئازیزەكەمانی پێدا تێدەپەڕێ، لە هەموومان دەخوازێ ناكۆكیيەكانمان بەلاوە بنێین، هەرچی زووترە لەسەر میكانیزمێك بۆ پێكهێنانی حكوومەتی فیدراڵی بەپێی دەستوور و لەسەر بنەمای سازانێكی ڕاستەقینە ڕێكبكەوین كە سەقامگیری و بەتواناییی حكوومەتەكە لە جێبەجێكردنی ئەركەكانیدا مسۆگەر بكات. گرنگترین ئەركیشی لەم قۆناغەدا، بەرەنگاربوونەوەی ئەو مەترسی و قه‌یرانانه‌یه كە ڕووبەڕووی عێراق بوونەتەوە.
سەرۆكایەتیی هەرێمی كوردستان لە ڕوانگه‌ی باوەڕی بە سەقامگیریی سیاسی و ئەمنیی عێراق و ئامادەیی بۆ كاری جددی لەو پێناوەدا، پێكهێنانی حكوومەتی نوێ بە پشتیوانیی هەموو لایەنە نیشتمانییەكان زۆر بە پێویست دەزانێ. لەو پێودانگەوە پێشوازی لە كاندیدكردنی بەڕێز مستەفا كازمی دەكەین بۆ پۆستی سەرۆكی وەزیرانی حكوومەتی فیدراڵی لەلایەن هێزە سیاسییەكانی پێكهاتەی شیعەوە. داوا لە هەموو لایەكیش دەكەین پشتیوانی بكەن تا بە زووترین كات ئەركەكانی پێكهێنانی حكوومەت تەواو بكات.
خوای مه‌زن پشتیوانمان بێت.
نێچیرڤان بارزانی
سەرۆكی هەرێمی كوردستان
چوار شەممە
8-4-2020
