وەزارەتی دارایی و ئابووری : سندوقی خانه‌نشینی له‌ هه‌رێمی كوردستان كارا ده‌كرێت

ئەنجوومەنی وەزارەتی دارایی و ئابووری حکومەتی هەرێمی کوردستان لە کۆبوونەوەی ئەمڕۆی خۆیدا بە لە بەرچاو گرتنی یاسای چاکسازی چەند بڕیارێکی دەرکرد.

لە ڕاگەیاندراوی کۆتایی ئەنجوومەنی وەزارەتی دارایی و ئابووری حکومەتی هەرێمی کوردستان دا بەڵینی کارا کردنی سندوقی خانە و تایبەت کردنی ژمارە بانکی دراوە .

دەقی بڕیارەکان

1- کاراکردنی سندوقی خانەنشینی لەهەرێمی کوردستاندا و کردنەوەی هه‌ژمارێكی تایبەتی بانکی بۆ ئەو سندوقە.

2- بەڕێوەبەرایەتی گشتی خانەنشینی راسپێردرا لەسەر ئامادەکردنی پەیکەری نوێی بەڕێوەبەرایەتی گشتی خانەنشین،  کە دەبێتە تاکە بەڕێوەبەرایەتی گشتی خانەنشینان لەهەرێمدا، بەشێوەیەک گشت خانەنشینانی (شارستانی، سەربازی، هێزەکانی ئاسایش و پۆلیسی ناوخۆ، یەکە رێکنەخراوەکانی هێزەکانی پێشمەرگە) لەخۆدەگرێت.

3- بەڕێوبەرایەتی گشتی ژمێرکاری راسپارد بۆ هەماهەنگی لەگەڵ وەزارەتی پیشمەرگە، بۆ ئەوەی هەنگاوی پێویست بگرنە بەر بەمەبەستی یەکخستن و رێکخستنی یەکەکانی ژمێریاری هێزەکانی پێشمەرگەی کوردستان.

4- بڕیاردرا لەسەر پەیڕەوکردنی میکانیزمێکی گونجاو بۆ لابردنی ئاستەنگەکانی بەردەم کردنەوەی هه‌ژمارێكی کەسی بۆ سەرجەم موچەخۆران.

5- ئامادەکردنی رێکارە یاسایی و کارگێڕییەکان، بۆ وەرگرتنەوەی قەرزە بازرگانیەکان.

6- بڕیاردرا لەسەر هەماهەنگی تەواو لە نێوان لیژنەی باڵای وەزارەتی دارایی و ئابووری تایبەت بە  جێبەجێکردنی یاسای چاکسازی لەگەڵ سەرجەم وەزارەتە پەیوەندیدارەکان لە پێناو جێبەجێکردنی خێرای یاساکەدا.