لەدوو پەیوەندی تەلەفۆنیدا، وەزارەتی دەرەوەی ئەمریکا هۆشداری تووند بە یەکێتی دەدا
دوای بڵاوبوونەوەی هەواڵی رادەستکردنی مستەفا سەلیمی بە رژێمی ئێران لەلایەن هێزێکی سەر بە یەکێتی، کە لە ٢٧ی مانگی ئادار لەگەڵ ٧٣ زیندانی دیکە دەرگای زیندانی سەقز دەشکێنن و رادەکەن. دوای مانەوەی چەند رۆژێک لە گوندەکانی رۆژهەڵات، دواجار بۆ پاراستنی گیانی خۆی لە حوکمی لە سێدارەدان روو لە گوندێکی سنووری پێنجوێنی سەر بە پارێزگای سلێمانی دەکات، بەڵام رۆژی ٣ی ئەم مانگە (نیسان) لەلایەن هێزێکی ئاسایشی پێنجوێن ( سەر بەیەکێتی) بەبیانووی پشکنینی کۆرۆنا لەو ماڵە دەبردرێ، کە لێی دەمایەوە، پاشان بە دەستوپێ بەستراوی رادەستی هێزەکانی ئیتلاعاتی ئێرانی دەکەن و بەرەبەیانی دوێنێ ١١ی نیسان لە زیندانی سەقز لە سێدارەدرا”.
هەر بەگوێرەی زانیاریەكان” ماوەیەک لەمەوبەر هەر ئەو هێزەی ئاسایش هەڵیان کوتایە سەر ژن وپیاوێکی دیکەی رۆژهەڵات، کە لەو سنوورە خانوویەکیان بەکرێ گرتبوو”.
لەئەنجامی ئەم پێشێلکاریانە، بەهۆی ئەوەی ئەمریکا سزای قوڕسی بەسەر ئێران سەپاندووە و هەموو لایەکیشی لە مامەڵەکردن لەگەڵ ئێران ئاگادار کردۆتەوە، بۆیە دوێنێ شەممە ١١ی نیسان وەزارەتی دەرەوەی ئەمەریکا لەرێگەی هەر یەک لە دەیڤد کۆپلی جێگری یاریدەدەری وەزیری دەرەوەی ئەمریکا بۆکاروباری عێراق – نوسینگەی ڕۆژھەڵاتی نزیک، جۆوی ھوود جێگری یەکەمی یاریدەدەری وەزیری دەرەوەی ئەمریکا – نوسینگەی ڕۆژھەڵاتی نزیک، لە پەیوەندییەكدا لەگەڵ لاھور جەنگی ھاوسەرۆکی یەکێتیی نیشتیمانیی کوردستاندا، هۆشدارییەکی تووندی پێ دەدەن، کە ئەوە خەرقی سزاکانی ئەمریکایە بەسەر ئەم وڵاتە. لەبەرامبەردا لاهور پاساوی بەوە هێناوەتەوە، کە ئەوەی کراوە لەئەنجامی رێکارەکانی روبەڕووبوونەوەی پەتای کۆرۆنا بێ گەڕانەوە بۆ ئاسایش بووە و ئاگای لێ نییە، بەڵام بەڵێنی پێداون کە ئەوەی بەو کارە هەڵساوە بە سزای خۆی دەگەیەنن و جارێکی دیکە دووبارە نابێتەوە.
جێی باسە دەیڤد کۆپلی جێگری یاریدەدەری وەزیری دەرەوەی ئەمریکا بۆکاروباری عێراق – نوسینگەی ڕۆژھەڵاتی نزیک، لەبارەی هەمان پرسەوە پەیوەندی تەلەفۆنی بە قوباد تاڵەبانی جێگری سەرۆکی ئەنجوومەنی وەزیرانی هەرێمی کوردستان لە پشکی یەکێتییەوە کرد و لە لێکەوتەکانی ئەم پرسە بەسەر پەیوەندی ئەمریکا و یەکێتی ئاگاداری کردبۆوە، بەڵام قوباد بێ ئاگایی خۆی پشاندابوو، هاوکات بەڵێنی بەدواداچوونی ئەو پرسەی پێدا بوو. هەر بۆیە پەیوەندیان بە لاهور کردووە، بەو پێیەی بەڕێوەبەرایەتییەکانی ئاسایش لە قەزا و ناحیەکانی ئەو زۆنەی بە زۆنی یەكێتی ناسراوە بێ فەرمانی لاهور هیچ هەنگاوێک نانێن. پێشتریش هۆشداری درابوو، کە لاهور تواناکانی ئاسایش لەم زۆنە بۆ ویستە شەخسیەکان و کردەوەکانی خۆی بەکاردێنێت.
بەپێی زانیارییەکان وەزارەتی دەرەوەی ئەمریکا بە فەرمی لەرێگەی حزبێکی کوردی رۆژهەڵاتەوە لە پرسی رادەستکردنەوەی مستەفا سەلیمی بە هێزەکانی ئیتلاعاتی ئێران لەلایەن چەند چەکدارێکەوە، کە خۆیان بە ئاسایشی پێنجوێن ناساندووە، ئاگادار کراوەتەوە”.
