سه‌رۆكی هه‌رێمی كوردستان پەیامی پرۆزبایی خۆی بە بۆنەی هاتنەوەی جەژنی سەری ساڵی ئایینی ئێزیدی ئاراستە دەکات
لە پەیامێکی پیرۆزباییدا نێچیرڤان بارزانی سەرۆکی هەرێمی کوردستان پیرۆزبایی خۆی ئاراستەی خوشک و برایانی ئێزدی دەکات و هیوادارە ئەمساڵە ساڵی سەرکەوتن و تەبایی بێت
په‌یاما سه‌رۆكێ هه‌رێما كوردستانێ بۆ سه‌رسالا ئێزدییان
جه‌ژنا سه‌رسالا ئێزدییان ل هه‌مى خوشك و برایێت مه یێت ئێزدى ل كوردستانێ و ل هه‌ر ده‌ره‌كا دنیایێ بن، ب تایبه‌تى ژى سه‌رسالا كه‌سوكارێت قوربانى یێت ده‌ستێ تیرۆرێ و یێت كو هێشتا د كه‌مپێت ئاواره‌ییێدانه، پیرۆز دكه‌م. هیڤیدارم جه‌ژن و هه‌لكه‌فتن و بیرهاتنێت مه یێت بێن، د ڕه‌وشه‌كا باشتردا ڤه‌گه‌ڕن.
ئیسال جه‌ژن د ده‌مه‌كێدا ڤه‌دگه‌ڕیت كو كوردستان ژى وه‌كى هه‌مى جیهانێ كه‌تیه بن باندۆرا كۆرۆنایێ، هه‌روسا هێشتا چاره‌نڤیسا ب هزاران خوشك و برایێت مه یێت ئێزدى یێت قوربانى یێت ده‌ستێ تیرۆرێ نه‌دیاره. د ڤێ ڕه‌وشێدا تڤیا ئه‌م هه‌مى پێگیرى ڕێنماییێت ته‌ندروستى بین و خۆ بپارێزین.
ب ڤێ هه‌لكه‌فتنێ جاره‌كا دى ئه‌م خوشك و برایێت مه‌یێت ئێزدى پشتڕاست دكه‌ین كو هندى خوشك و برایه‌كێ مه یێ ئێزدى وندا مابێت، چ پێویسته دێ كه‌ین داكو تشته‌كێ ژ چاره‌نڤیسێ وان بزانین و ڕڤاندى یێت مایى ژى ڕزگار بكه‌ین، دێ لسه‌ر هه‌ولێت خۆ ژى بۆ بپارێزگه‌هكرنا شه‌نگالێ و ئاڤه‌دانكرنا ده‌ڤه‌رێت ئێزدییان به‌رده‌وام بین.
جه‌ژن و سه‌رسالا وه پیرۆز بیت، هه‌ر سال ب خێر و خۆشى.
نێچیرڤان بارزانى
سه‌رۆكێ هه‌رێما كوردستانێ
14/4/2020
