سه‌رۆكی هه‌رێمی كوردستان په‌یامێكی بڵاوكرده‌وه
له په‌یامێكدا به بۆنه‌ی 1ی ئایار، ڕۆژی جیهانی كرێكاران، نێچیرڤان بارزانی، سه‌رۆكی هه‌رێمی كوردستان په‌یامێكی بڵاوكرده‌وه و له په‌یامه‌كه‌شدا پیرۆزبایی له كرێكارانی كوردستان و سه‌ندیكاو ڕێكخراوه‌كانیان كرد.
دەقی پەیامەکەی نێچیرڤان بارزانی، سەرۆکی هەرێمی کوردستان:
بە بۆنەی یادی یەكی ئایار، ڕۆژى جیهانیی كرێكارانەوە، گەرمترین پیرۆزبایی لە كرێكارانی كوردستان و سەندیكا و ڕێكخراوەكانیان، هەروەها پیرۆزبایی لە تێكڕای كرێكارانی عێراق و جیهان به‌گشتى دەكەم.
كرێكارانی كوردستان بازووی ماندوونەناس و كاران و ڕۆڵێكی دیارى بنیادنەرانە لە ئاوەدانكردنەوەی وڵاتدا ده‌گێڕن كه هەمیشە بەرچاو و جێی ڕێز و پێزانینە. لەم یادە پیرۆزەدا، ته‌واوى پشتیوانیی خۆمان بۆ ماف و داوا یاسایی و سەندیكاییە ڕەواكانیان، گوزەرانی شایستە و هەلومەرجی لەباری كاركردنی كرێكاران و بەدیهێنانی خۆشگوزەرانی بۆ ئەو چینە زەحمەتكێشە و تەواوی خەڵكی كوردستان، دووپات دەكەینەوە.
هیوادارین وڵاتەكەمان و جیهان هەرچی زووترە لە قەیران و كێشه‌كانى ده‌رهاویشته‌ى په‌تاى كۆرۆنا دەرباز ببن كە بەداخەوە كاریگەریی خراپی لەسەر ڕەوشی ژیانی هەمووان و بەتایبەتى كرێكاران و ڕەنجدەران دروست كردوە، بەو ئومێدەی ساڵی داهاتوو لە دۆخێكی باشتردا ئەم یادە بكەینەوە.
ڕۆژى جیهانیى كرێكاران له هه‌موو لایه‌ك پیرۆز بێت.
نێچیرڤان بارزانی
سەرۆكی هەرێمی كوردستان
1/5/2020
