روسیا : له‌باره‌ی توشبوانی كۆرۆنا ژماره‌ی پێوانەیی تۆماركرد
ئه‌مڕۆ شه‌ممه 2-5-2020 لیژنەی تایبەت بە روبەروبونەوەی ڤایرۆسی كۆرۆنا لە روسیا ئاماری 24 كاتژمێری توشبوان و قوربانیانی كۆرۆنای بڵاوكردەوە.
لیژنەی تایبەت بە روبەروبونەوەی ڤایرۆسی كۆرۆنا رایگەیاند، لە ماوەی 24 كاتژمێری رابردودا 9623 توشبوی نوێی كۆرۆنا تۆماركراوە كە زۆرینەیان لە مۆسكۆ بون، ئەوەش تۆماركردنی ژمارەی پێوانەییە لەو كاتەوەی ڤایرۆسەكە لەو وڵاتە بڵاوبوەتەوە.
لیژنەكە راشیگەیاندوە، ژمارەی مردوانی پەتاكە بەراورد بە رۆژانی پێنج شەممە و هەینی كەمبوەتەوە و لە 24 كاتژمێری رابردودا 57 كەسی توشبوی پەتاكە گیانیانلەدەستداوە.
ئاماژەی بەوەشكردووە، لەئێستادا كۆی گشتی توشبوانی كۆرۆنا لە روسیا گەیشتوەتە 123 هەزار و 54 كەس، لەو ژمارەیەش 1222 كەس گیانیان لەدەستداوە”
ئەوەش خراوەتەرو كە لەماوەی 24 كاتژمێری رابردودا 1793 كەس پەتاكەیان پەڕاندوە و كۆی گشتی ئەو كەسانەی چاكبونەتەوە گەیشتوەتە 15013 كەس.
