سەرۆکی حکومەتی هەرێمی کوردستان پێشوازی لە کونسوڵی ئەمەریکا دەکات
![](https://xwakurk.com/wp-content/uploads/2020/05/webste-qalb-wena-54.jpg)
مەسرور بارزانی سەرۆکی حکومەتی هەرێمی کوردستان ئەمڕۆ پێنج شەممە لە هەولێر پێشوازی لە ستیڤن فەیگن کونسوڵی گشتی ئەمەریکا لە هەولێر کرد
لە و کۆبوونەوەدا دوولایەن وێرای ئەوەی دەربارەی دۆخی هەرێمی کوردستان و عێراق گفتوگۆیان کرد ، کونسوڵی ئەمەریکا رێکارە سەرکەوتووەکانی حکومەتی هەرێمی کوردستانی وەک پلانی رووبەرووبوونەوەی کۆرۆنا بە ئەرێنی وەسف کرد .
هاوکات مەسرور بارزانی سەرۆکی حکومەتی هەرێمی کوردستان وێڕای ئەوەی دۆخی سەختی دارایی ئێستای هەرێمی کوردستانی هێنایە بەر باس ، ئاماژەی بەوەدا کە حکومەتی هەرێم پلانی تایبەتی بۆ رووبەڕووبوونەوەی ئەم دۆخە پەسەند کردووە و بەردەوام دەبێت لە کەمکردنەوەی خەرجییەکان و زیادکردنی داهاتەکانیش ڕەوتێکی نوێ دەگرێتە بەر .
سەبارەت بە پەیوەندییەکانی بەغدا و هەولێر ، سەرۆکی حکومەت جەختی لەوە کردەوە کە گفتوگۆکان بەردەوام دەبن بە ئاراستەی چارەسەرکردنی کێشەکان لە سەر بنەمای دەستوور بۆ ئەوەی مافی هەموولایەک پارێزراو بێت .
لە کۆتاییدا دوولایەن هاوڕابوون لە سەر بەهێزکردنی پەیوەندییەکانی هەمەلایەنە و پەرەپێدانی وەبەرهێنانی ئەمەریکی لە هەرێمی کوردستان.
سەرۆکی حکومەت داوای کرد بەرێکاری دیپلۆماسی ئەمەریکا و کۆمەڵگەی نێودەوڵەتی پشتگیریی هەرێمی کوردستان و عێراق بکەن بۆ تێپەڕاندنی ئەو قەیرانە داراییەی لە ئێستادا بەرۆکی ئەو وڵاتەی گرتووە .