سەرۆکی هەرێمی کوردستان بە بۆنەی ساڵیادی دامەزراندنی یەکێتی پیرۆزبایی خۆی ئاراستە دەکات
لە پەیامێکی پیرۆزباییدا نێچیرڤان بارزانی سەرۆکی هەرێمی کوردستان ، پیرۆزبایی ٤٥ ساڵەی دامەزراندنی یەکێتی نشتیمانی کوردستان ئاراستەی هاوسەرۆكان و ئەنجوومەنی باڵای سیاسی و بەرژەوەندی و مەكتەبی سیاسي یەكێتی نیشتمانی كوردستان دەکات.
لە بەشێکی پەیامەکەیدا دەنووسێت ، له كاتێكدا هه‌رێمى كوردستان وه‌ك عێراق و ناوچه‌كه، رووبه‌ڕووى دۆخێكى هه‌ستيار و ته‌حه‌دياتى گه‌وره بووه‌ته‌وه، له هه‌موو كاتێك زياتر پێويستيمان به ته‌بايى، كارى هاوبه‌ش و يه‌كڕيزى هه‌يه كه تاکه رێگه‌ى سه‌ركه‌وتن و بنه‌ماى هه‌موو ده‌سكه‌وته‌كانه. له ڕابردوودا هاوكارى و هه‌ماهه‌نگيى سه‌رۆك مام جه‌لال كه ئه‌مڕۆ به رێزه‌وه يادى ده‌كه‌ينه‌وه، له‌گه‌ڵ سه‌رۆك مه‌سعود بارزانى، سه‌لمێنه‌رى ئه‌و راستييه‌ن.”
دەقی پەیامەکەی سەرۆکی هەرێمی کوردستان بۆ یەکێتی
به‌ڕێزان هاوسەرۆكان و ئەنجومەنی باڵای سیاسی و بەرژەوەندی و
مەكتەبی سیاسي یەكێتی نیشتمانی كوردستان
له (45)هه‌مين ساڵيادى دامەزراندنی یەكێتی نیشتمانی كوردستاندا، پیرۆزبایی لە ئێوەی بەڕێز و سەركردایەتی و ته‌واوى ئه‌ندامان و جەماوەری یەكێتی دەكه‌م، هيواى سه‌ركه‌وتنتان بۆ ده‌خوازم.
یەكێتيى نيشتماني كوردستان، بەشێكی گرنگى بزووتنەوەی ڕزگاریخوازيی كوردستانه، لەگەڵ پارتی ديموكراتى كوردستان و لایەنەكانی دیكەدا، هاوبەشی سەرەكی بوونە لە ده‌سكه‌وته‌كان و پرۆسەی سیاسی و بنياتنانى دامەزراوەكانی هەرێمی كوردستان و لە چەسپاندنی مافەكانی گەلی كوردستان لە دەستووری عێراقدا.
ئێستاش له كاتێكدا هه‌رێمى كوردستان وه‌ك عێراق و ناوچه‌كه، ڕووبه‌ڕووى دۆخێكى هه‌ستيار و ته‌حه‌دياتى گه‌وره بووه‌ته‌وه، له هه‌موو كاتێك زياتر پێويستيمان به ته‌بايى، كارى هاوبه‌ش و يه‌كڕيزى هه‌يه كه تاکه ڕێگه‌ى سه‌ركه‌وتن و بنه‌ماى هه‌موو ده‌سكه‌وته‌كانه. له ڕابردوودا هاوكارى و هه‌ماهه‌نگي سه‌رۆك مام جه‌لال كه ئه‌مڕۆ به ڕێزه‌وه يادى ده‌كه‌ينه‌وه، له‌گه‌ڵ سه‌رۆك مه‌سعوود بارزانى، سه‌لمێنه‌رى ئه‌و ڕاستييه‌ن.
بۆ سه‌قامگيريى سياسى و یەكهەڵوێستى لەسەر پرسە سەرەكییەكانی گەلی كوردستان، تێپەڕاندنى سه‌ركه‌وتووانه‌ى دۆخه‌كه، پاراستنى قه‌واره‌ى ده‌ستووری هه‌رێمى كوردستان و ده‌سته‌به‌ركردنى مافه ده‌ستوورييه‌كانى گه‌لى كوردستان، سەرۆكایەتي هەرێمی كوردستان له‌گه‌ڵ هه‌موو لايه‌ن و پێكهاته‌كان له هه‌وڵه‌كانى به‌رده‌وام ده‌بێت، چاوه‌ڕێى هەڵوێستی كوردستانیانه‌ش له هه‌مووان دەكەین.
له‌م ياده‌دا دروود بۆ گيانى شه‌هيدانى يه‌كێتی نيشتمانی كوردستان و ته‌واوى شه‌هيدانى كوردستان كه گيانيان له‌پێناو ئازاديى گه‌له‌كه‌ياندا به‌خشى، سه‌رى ڕێز و نه‌وازش له به‌رده‌مياندا داده‌نوێنين و سڵاو و ڕێز بۆ خانه‌واده سه‌ربه‌رزه‌كانيان ده‌نێرين.
نێچیرڤان بارزانی
سەرۆكی هەرێمی كوردستان
31/5/2020
