فه‌ره‌نسا سه‌ركه‌وتنی به‌سه‌ر ڤایرۆسی كۆرۆنا راگه‌یاند

سەرۆکی فەرەنسا رایگەیاند، جێی شانازیانە سەرکەوتنیان بەسەر ڤایرۆسی کۆرۆنادا بەدەستهێناوە و بڕیاریانداوە، لە 22ی حوزەیراندا دووبارە قوتابخانەکان بکەنەوە.

ئیمانوێل ماکرۆن، سەرۆکی فەرەنسا شەوی رابردوو (یەکشەممە، 15-6-2020) لە کۆشکی سەرۆکایەتیی فەرەنسا (ئێلیزێ)ـوە، گوتارێکی 20 خولەکی پێشکەش کرد و باسی هەنگاوە نوێیەکانی فەرەنسای کرد بۆ رووبەڕووبوونەوەی کۆرۆنا. ئەمە چوارەم گوتاری هاوشێوەیە کە ماکرۆن لەماوەی پەتای کۆرۆنا پێشکەشی خەڵکی وڵاتەکەی دەکات.

ئاماژەی بەوەشکرد، بڕیاریان داوە رێکارەکانی قەدەغەی هاتوچۆ کۆتایی پێبێت و دوبارە رێگە بە کردنەوەی رێستۆرانت و کافتریاکان بدرێت بە جێبەجێکردنی رێکارەکان تەندروستییەکان.

باسی لەوەشکرد، رووبەرووبوونەوەی ڤایرۆسەکە هێشتا کۆتایی نەهاتووە، بەڵام من گەشبینم بەوەی یەکەم سەرکەوتنمان بەسەر ڤایرۆسەکەدا بەدەستهێنا.

ئەوەشی خستەڕوو، پابەنددەبن بە دووبارەکردنەوەی قوتابخانەکان لە 22ی حوزەیراندا، دەشڵێت، لەو شوێنانەی کە ژمارەیەکی زۆر هاوڵاتی تیایدا کۆدەبنەوە، رێکارەکان تونددەبن.

تا ئێستا فەرەنسا، زیاتر لە 156 هەزار حاڵەتی توشبوون بە ڤایرۆسی کۆرۆنا تۆمارکراوە لەو ژمارەیەش، 73 هەزار کەس چاکبوونەتەوە و 29 هەزار کەسیش گیانیان لەدەستداوە.