مسته‌فا كازمى و دۆناڵد تره‌مپ له كۆشكی سپی كۆ ده‌بنه‌وه
رۆژنامه‌یه‌كى عه‌ره‌بى ئاشكراى كردووه، بڕیاره له كۆتایى مانگى ته‌مووزى داهاتوو مسته‌فا كازمى سه‌رۆك وه‌زیرانى عێراق سه‌ردانى ئه‌مه‌ریكا بكات و له‌گه‌ڵ دۆناڵد تره‌مپى سه‌رۆكى ئه‌مه‌ریكا كۆ ببێته‌وه.
رۆژنامه‌ى “عه‌ره‌بى جه‌دید” له راپۆرتێكدا باسى له سه‌ردانێكى مسته‌فا كازمى كردووه بۆ ئه‌مه‌ریكا و گوتوویه‌تى، سه‌ردانه‌كه له مانگى داهاتوو “ته‌مووز” ده‌بێت.
به‌رپرسێكى نووسینگه‌ى كازمى كه ناوى ئاشكرا نه‌كراوه گوتوویه‌تى، سه‌ردانه‌كه‌ى له دواى 20ى ته‌مووز ده‌بێت و له‌باره‌ی ئه‌وه‌وه له‌گه‌ڵ لایه‌نى ئه‌مه‌ریكى رێكده‌كه‌وێن.
بڕیاره له‌م سه‌ردانه‌دا مسته‌فا كازمى و دۆناڵد تره‌مپ له واشنتن كۆببنه‌وه، باس له چه‌ندان دۆسیه‌ى گرنگ بكه‌ن له‌وانه‌ى هه‌ژموونى ئێران له عێراق، رێككه‌وتنى ستراتیجى نێوان ئه‌مه‌ریكا و عێراق، جگه له‌وه‌یش وه‌ك به‌رپرسه‌كه باسى كردووه كازمى چاوه‌ڕوانی كۆمه‌كى دارایى له ئه‌مه‌ریكا ده‌كات.
