لە سلێمانی ناوی قوتابخانەكان دەگۆڕدرێن بۆ ناوی سەركردەی حزب

شوان محمەد سەرنووسەری ماڵپەری سپی میدیا، لەسەر  گۆڕینی ناوی  قوتابخانەی “حەمدی” بۆ قوتابخانەی “وەسفیە بەنی وەیس” لە تۆری كۆمەڵایەتی فەیسبووك دەنووسێت، ئەگەر یەکێتی راستدەکات و دەیەوێت رێز لە کادیرە کۆچکردوو زیندوەکانی بگرێت، با لە سەروەت و سامانی خۆی قوتابخانە، یان باخچە یان هەرشتێکی تر دروستبکات تا ناو ناوبانگی کادیرە دیارەکانی خۆی پێ بپارێزێ، رەنگە هێندەی مانگێکی ئەو پارەیەی تێنەچێت کە بەدرێژایی چەند ساڵە بۆ کڕینی وەلائات رۆژانە بەسەر خەڵکدا دەیبەخشنەوە، نەک لەسەر حسابی قوتابخانەکانی حکومەتی هەرێم، یان قوتابخانەیەکی وەک “حەمدی ” کە کەسایەتی حەمدی کەسایەتییەکی شاعیر و تێکۆشەری سیاسی و خوێندەوارو پیاوی دەوڵەتی حکومەتەکەی شێخ مەحمود بووە، هەروەها شوان محمەد ئەوەشی لەسەر ئەو ناو گۆڕینە  نووسیەوە دەلێت عەقڵەیەتی سیاسی ئەم ولآتە کە سیمای شارەکەمیان گۆڕیووەو لە شارێکی کەلتووریەوە کردوویانە بە ئۆردویەکی سیاسی و قەلآی چواردەوردراو بە پاسەوانی خانوە گەورەکان و کۆمپانیاکانیان دەورەداوە.

هەروەها چاودێرانی سیاسی پێیان وایە لە سلێمانی زۆر بەئاسانی هەست بە زاڵبونی كەلتوری ریش داكوتاوی حزبی دەكەیت، هەم لە زۆری وێنەی سەركردەكانی یەكێتی هەم لە وێنەی كادیر و لایانگرانی ئەو حزبە كە پێشتر شەهید بوونە، ئەمەش لەكاتێكدایە كە هەر لەو شارە رەخنە لە حزبی تر دەگیرێت لەسەر ئازادی سیاسی و فەزای دیموكراسی و فرەحزبی.