سەرۆکی حکوومەتی هەرێمی کوردستان پێشوازی لە سەرۆکی تیمی لێکۆڵینەوەی نێودەوڵەتی لە تاوانەکانی داعش دەکات
مه‌سرور بارزانی جه‌خت له گرنگی خێراتركردنی ڕێكاره‌كانی دادگاییكردنی تاوانبارانی داعش ده‌كاته‌وه‌و ده‌ڵێت: ئه‌م دادگاییكردنه هه‌نگاوێكی گرنگه بۆ هێنانه‌دی دادپه‌روه‌ری و ڕێگریكردن له دووباره‌بوونه‌وه‌یان له داهاتوودا.
ئه‌مڕۆ پێنج شه‌ممه 2020/7/23 مه‌سرور بارزانی ،سه‌رۆكی حكومه‌تی هه‌رێمی كوردستان پێشوازی له كه‌ریم ئه‌حمه‌د خان، ڕاوێژكاری تایبه‌تی و سه‌رۆكی تیمی لێكۆڵینه‌وه‌ی نێوده‌وڵه‌تی له تاوانه‌كانی داعش ( یونیتاد UNITAD ) كرد.
له دیداره‌كه‌دا گفتوگۆ ده‌رباره‌ی ئاماده‌كارییه‌كانی دادگاییكردن و به سزاگه‌یاندنی تاوانبارانی ڕێكخراوی تیرۆریستی داعش كرا.
ڕاوێژكاری تایبه‌تی و سه‌رۆكی تیمی لێكۆڵینه‌وه‌ی نێوده‌وڵه‌تی له تاوانه‌كانی داعش، تیشكی خسته سه‌ر ڕێكاره یاسایی و ته‌كنیكییه‌كانی دادگاییكردنی تاوانبارانی داعش له سه‌ر ئه‌و تاوانانه‌ی به‌رامبه‌ر مرۆڤایه‌تی ئه‌نجامیان داوه . به تایبه‌تی پرۆسه‌ی كۆكردنه‌وه‌ی به‌ڵگه و به دیجیتاڵكردنی ئه‌رشیڤی تاوانه‌كانی داعش . سوپاسی هه‌ماهه‌نگیی و پشتیوانیی حكومه‌تی هه‌رێمی كوردستانیشی له مباره‌یه‌وه كرد.
سه‌رۆكی حكومه‌تی هه‌رێمی كوردستان جه‌ختی له گرنگیی خێراتركردنی ڕێكاره‌كانی دادگاییكردنی تاوانبارانی داعش كرده‌وه، چونكه ئه‌م دادگاییكردنه هه‌نگاوێكی گرنگه بۆ هێنانه‌دی دادپه‌روه‌ری و ڕێگریكردن له دووباره‌بوونه‌وه‌یان له داهاتوودا.
گوتیشی: ئێمه ئاماده‌یی هه‌ر هاوكاریی و هه‌ماهه‌نگییه‌كین و پێویسته هه‌رێمی كوردستانیش، به‌شدارییه‌كی كارای له به‌ڕێوه‌چوونی ئه‌و دادگا نێوده‌وڵه‌تییه هه‌بێت، چونكه هه‌رێم له شوێنه‌كانی دیكه زیاتر بووه‌ته قوربانی ده‌ستی تاوانبارانی داعش .
