سەركردەیەكی پارتی: پارتی كۆنگرە دەبەستێت
خواكوڕك
دوای تێپەڕبوونی وادەی گرێدانی كۆنگرەی چواردەی پارتی دیموكراتی كوردستان بە هۆی دۆخی ناوچەكەو شەڕی داعش ئەندامێكی ئەنجومەنی سەركردایەتیی پارتی دیموكراتیی كوردستان ئاشكرای دەكات كە “پارتی دوای كۆتا هاتنی مەترسیەكانی داعش لەسەر هەرێم، كۆنگرە دەبەستێت”.
عەلی تەتەر، ئەندامی ئەنجومەنی سەركردایەتیی پارتی دیموكراتیی كوردستان، بە ماڵپەڕی (باسنیوز)ی ڕاگەیاندووە:” لەگەڵ ئەوەی ماوەی دوو ساڵ بەسەر وادەی ئاسایی بەستنی كۆنگرەی پارتی لایداوە بەھۆی بوونی شەڕی داعش، ئەمەش حاڵەتێكی ئاساییە، چونكە بارودۆخەكە گونجاو نەبووە، بۆیە پارتی بەستنی كۆنگرەی دوا خستووە”.
ئەو بەر پرسەی پارتی دەشڵێت: ” بۆ بەستنی كۆنگرە، چاوەڕێی زەمینەیەكی لەبار دەكەین، ھەر كاتێك بارودۆخەكە ئاسایی بووەوە و كۆتایی بە شەڕی داعش ھات، ئەو كاتە پارتی كۆنگرەی خۆی دەبەستێت, ئێمە لەوە زیاتر كۆنگرە دوا ناخەین”.
لە كۆتای قسەكانیدا عەلی تەتەر ئەندامی ئەنجومەنی سەركردایەتیی پارتی دیموكراتیی كوردستان گوتی: ” بۆ بەستنی كۆنگرە، مەرج نییە شەڕی داعش كۆتایی پێ بێت، بەڵام ھەر كاتێك شەڕەكە سووك بووەوە، ئەو كاتە ئێمە زەمینەسازی بۆ بەستنی كۆنگرە دەكەین”.
