په‌رله‌مانتارێكی یه‌كێتی نهێنی به قه‌زاكردنی ئامرلی له‌لایه‌ن حزبه‌كه‌یه‌وه ئاشكرا ده‌كات
خواكوڕك
په‌رله‌مانتارێكی یه‌كێتی له په‌رله‌مانی عێراق رایده‌گه‌ینێت، “لە كۆبوونەوەی ژمارە (3)ـی 26/1/2016ـی ئەنجومەنی سەڵاحەدیندا كە تێیدا (16) كەس بەشداربوون، نوێنەرە كوردەكە(كه‌مه‌به‌ست له‌و كه‌سه مه‌لا حه‌سه‌ن-ه) بە زنجیرە (8) لەكۆی (16) كەسەكە تۆماركراوە، 10 بڕیار بە كۆی دەنگ دەرچووە كە بڕیارێكی زنجیرە (9)ـی پێدراوە تایبەتە بە بەرزكردنەوەی ئامرلی لە ناحیەوە بۆ قەزا”.
شوان داودی په‌رله‌مانتاری عێراق له فراكسیۆنی یه‌كێتی نوسینێكی له‌پێگه‌ی تایبه‌تی خۆی له‌تۆڕی كۆمه‌ڵایه‌تی فه‌یسبووك به‌ناونیشانی (مەلا حەسەن ئامرلی كرد بە قەزا) بڵاوكردۆته‌وه و باس له‌كه‌سێك ده‌كات كه له‌سه‌ر لیستی یه‌كێتی كه تاكه ئه‌ندامی ئه‌نجومه‌نی سه‌ڵاحه‌دین ده‌بێت له‌پشكی كورد، به‌نزیك بوونه‌وه‌ی له‌سه‌ر كرده‌یه‌كی شیعه، هه‌وڵی به‌ده‌ستهێنانی پۆستی جێگری پارێزگاری سه‌ڵاحه‌دین ده‌دات.
ده‌شڵێت، “ئەحمەد عەبدوڵا جبووری، ناسراو بە (ئەبو مازن)، دوای ئەوەی لە مانگی 8\2015، پۆستی وەزیر لە حکوومەتی عێراق لادرا بەهۆی هەڵوەشاندنەوەی وەزارەتی کاروباری پەرلەمان و پارێزگاکان، کاری بۆ گەڕانەوەی بۆ پۆستی پارێزگاری سەڵاحەدین کردووە، لە کاتێکدا كورد لە ئەنجومەنی پارێزگای سەڵاحەدیندا تەنها یەك كورسی هەیە كە كادیرێكی یەكێتیی نیشتمانیی كوردستان بە ناوی (حەسەن محەمەد ئەحمەد عەباس) ناسراوە بە مەلا حەسەن لەو پۆستە دایە.
په‌رله‌مانتاره‌كه‌ی یه‌كێتی ئه‌وه‌شی ئاشكرا كردووه، “کە مەلا حەسەن لە دژی ئەبو مازن، چووەتە بەرەی مشعان جبووری و لە بەغدا لە ماڵی ئەبو مەهدی موهەندیس، سەرکردەی بڕیاردەری حەشدی شەعبی، ئاهەنگی سوێندخواردنی هاوپەیمانێتییەکیان بەڕێوە بردووە.”.
ئه‌وه‌ش هاتووه، “ئەبو مازن بۆ ئەوەی بەرپرسەکەی یەکێتی لە سەڵاحەدین پشتیوانییان بکات، لەگەڵیاندا کەوتووەتە گفتوگۆ و بەڵێنی پێ داون کە لە کاتی وەرگرتنی پۆستی پارێزگاردا، پۆستی جێگری پارێزگار بە کورد بدەن، چونکە ”ئەو کورسییەی کورد پرسەکەی یەکلا دەکردەوە“، بۆیە لە فراکسیۆنی یەکێتی هەوڵیان داوە بەرپرسانی کورد لە قەزای خورماتوو و ئەنجومەنی پارێزگای سەڵاحەدین، لەگەڵ ئەبو مازندا ڕێک بکەون”.
هه‌روه‌ها ده‌شڵێت، “بەڵام دواجار لە ڕێگەی فشارەکانی سەرۆکایەتیی کۆماری عێراقەوە، نووسراوێک لەمبارەیەوە دەکرێت و لە 12\4\2016 مەرسوومی کۆماری بۆ بە پارێزگاربوونی ئەبو مازن دەردەچێت، لە بەرامبەریشدا پارێزگاری سەڵاحەدین لە یەکەم کاریدا، پۆستی بەڕێوەبەری تەندرووستیی سەڵاحەدین کە کورد بە پشکی خۆی دەزانێت، لادەدات و لە 4\1\2017ش بڕیارێکی ئەنجومەنی پارێزگای سەڵاحەدین بۆ بە قەزابوونی ئامرلی دەردەکات”.
ده‌قی روونكردنه‌وه‌كه‌ی ئه‌ندام په‌رله‌مانه‌كه:
مەلا حەسەن ئامرلی كرد بە قەزا !
شوان داودی
دوای ئەوەی لە ئابی 2015، حەیدەر عەبادی، سەرۆك وەزیرانی عێراق، زنجیرەیەك چاكسازی راگەیاندو چەندین وەزارەتی هەڵوەشاندەوە یاخود تێكەڵ كرد، یەكێ لەو وەزارەتانەی كە هەڵوەشایەوە، وەزارەتی كاروباری پەرلەمان و پارێزگاكان بوو كە ئەحمەد عەبدوڵڵا جبوری ناسراو بە (ئەبو مازن) وەزیری بوو.
ئەبو مازن دوای هەڵوەشاندنەوەی وەزارەتەكەی و لەدەستدانی پۆستەكەی كەوتە كاركردن بۆ گەڕانەوە بۆ شوێنی خۆی كە بەر لە هەڵبژاردنەكانی رابردوو پارێزگاری سەڵاحەدین (تكریت) بووە، بۆ ئەو پۆستەش پێویستی بە (نیوە+ 1)ـی دەنگەكانی ئەنجومەنی پارێزگاكەیە كە لە (29) كورسی پێكدێت، واتە بە (16) دەنگ دەتوانێ پۆستی پارێزگار مسۆگەر بكاتەوە، ئەبو مازن پێش بوونی بە وەزیر، پۆستەكەی خۆی داوە بە (رائید جبوری)ـی ئامۆزای، كاتێك كە ویستی بگەڕێتەوە، (رائید)ـی ئامۆزای ئامادە نەبوو پۆستەكەی بداتەوە، بۆیە جبورییەكان لەسەر پۆستی پارێزگار بوون بە دوو بەرەوە، بەرەیەك پێكهاتبوو لە رائید جبوری پارێزگارو مەشعان جبوری ئەندامی پەرلەمان و نزیك لە شیعەو قوتەیبە جبوری ئەندامی پەرلەمان كە ئەویش وەزارەتەكەی هەڵوەشایەوە كە وەزارەتی ژینگە بوو، بەڵام ئەو گەڕایەوە پەرلەمان، چونكە شوێنەكەی پڕ نەكرابۆوە، ئەمانە هەموویان بەرانبەر ئەبو مازن وەستان. هەردوولایان بەجیا لەناو كوتلەكانی ئەنجومەنی سەڵاحەدین و ئەندامانی ئەنجومەنەكە كەوتنە كاركردن و لە ململانێیەكی سەختدا بوون بۆ دەستەبەركردنی (نیوە+ 1)ـو بردنەوەی پۆستەكە، كورد لە ئەنجومەنی پارێزگای سەڵاحەدین تەنها یەك كورسی هەیە كە كادرێكی یەكێتی نیشتمانی كوردستانە بە ناوی (حەسەن محەمەد ئەحمەد عەباس )ـەوەو ناسراوە بە مەلاحەسەن و نوێنەرایەتی دەكات.
ئەم زاتە واتا (مەلا حەسەن) كەوتە بەرەكەی (رائید ـ مشعان ـ قوتەیبە)ـی دژ بە (ئەبو مازن)، هەر بەو بۆنەیەشەوە بەشداری ئاهەنگی سوێندخواردنی هاوپەیمانییەكەی لە بەغدا كردو كە بە كۆمەڵ سوێندیان بە قورئانی پیرۆز خوارد كە خیانەت لە یەك نەكەن و دواتر بەشداری كۆبونەوەی هاوپەیمانییەكەیانی لە ماڵی (ئەبو مەهدی موهەندس) سەركردەی بڕیاردەری حەشدی شەعبی كرد لە بەغدا كە لەسەودایەكی سیاسیدا موبارەكەی هاوپەیمانییەكەی كرد.
ئەبو مازن بۆ ئەوەی نوێنەرە كوردەكە لەو بەرەیە بهێنێتە دەرەوە، كەوتە گفتوگۆكردن لەگەڵمان و بەڵێنی ئەوەی پێداین كە لە كاتی وەرگرتنی پۆستی پارێزگادا جێگری پارێزگا بداتە كورد، چونكە ئەو تەنها كورسیەی كورد پرسەكەی یەكلایی دەكردەوە، بۆ ئەم مەبەستە بەندە (شوان داودی) وەك پەرلەمانتارێكی ناوچەكەو خاتوو (ئاڵا تاڵەبانی) وەك سەرۆكی فراكسیۆنی یەكێتی لە ئەنجومەنی نوێنەرانی عێراق، لەگەڵ مەكتەبی سیاسی و سەركردایەتی خۆمان كەوتینە گفتوگۆ بۆ ئەوەی قەناعەت بە مەلا حەسەن بهێنن بڕواتە بەرەكەی ئەبو مازن، چونكە ئەوەی شارەزای دۆخی سیاسی سەڵاحەدین بێت، دەزانێت یاریكەری سەرەكی ئەو پارێزگایە ئەبو مازنەو لە كۆتاییدا ئەو گرەوەكە دەباتەوە، بۆیە چ لەگەڵ بەرپرسانی حیزبی و ئیداری خورماتوو لە لایەك و چ لەگەڵ سەرووی خۆمان زۆرمان هەوڵدا، من پێموابوو مەلا حەسەن سەربەخۆ كاردەكات، بۆیە لەگەڵ بەڕێز مەلا كەریم بەرپرسی بازنەی حەمرینی یەكێتی لە خورماتوو قسەم كردو داوام لێكرد پەشیمانی بكاتەوە، بەڕێزیان پێیراگەیاندم كە مەلا حەسەن سەربەخۆ كاری نەكردووەو پرس و رای پێ كردووین و ئاگاداری هەنگاوەكانین.
بۆ ئەوەی فشاریان لەسەر دروستبكەم لە ژمارە (635)ـی (2)ـی تشرینی یەكەمی 2015 ـی رۆژنامەی (هەواڵ) راپۆرتێكم لەسەر ئەو پرسە بڵاوكردەوە بە وێنەیەكی ئاهەنگی سوێند خواردنەكەوە كە مەلا حەسەن بەدیار قورئانەكەوە لەگەڵ جەماعەت وەستاون و لەگەڵ هەڤاڵ سامان گەرمیانی كەوتینە هەوڵدان بۆ فشار خستنەسەر برادەرانی خورماتوو تا لەو بەرەیە بكشێنەوە، بەڵام بێهوودە بوو، ناچار سەردانی هەڤاڵ رەفعەت عەبدوڵڵا بەرپرسی مەكتەبی رێكخستنم كردو مەترسیەكانی خۆم لەو بارەیەوە پێی راگەیاند، ئەویش هەر یەك لە مەلا كەریم و مەلا حەسەن و شەلال عەبدول قایمقامی خورماتووی بانگهێشتكردو بۆ ئەو مەبەستە قسەی لەگەڵیان كرد، بەڵام ئەم سێ هەڤاڵە قەناعەتیان بە كاك رەفعەت كرد بەوەی ئەو بەرەیە راستە كە هەڵیان بژاردووەو بە كاك رەفعەت-یان راگەیاندبوو كە بەرپرسیارێتی ئەنجامەكەی هەڵدەگرن… دوای ئەو قسەیەی كە ئەوان بەرپرسارێتی ئەو پرسە هەڵدەگرن، من هەوڵمدا راستەوخۆ دەست لەو پرسە وەرنەدەم و وەكو چاودێر مامەڵەی لەگەڵ بكەم، لەولاشەوە شیعەكان لە بەغدا پشتیوانی بەرەی (رائد، مشعان، قوتەیبە)یان كرد كە ئەندامە كوردەكەش لەگەڵیانەو بەوەوە (16) كەسن، واتا كوردەكە رێژەی یاساییان بۆ دەستەبەردەكات.
لە كۆبوونەوەی ژمارە (3)ـی 26/1/2016ـی ئەنجومەنی سەڵاحەدیندا كە تێیدا (16) كەس بەشداربوون، نوێنەرە كوردەكە بە زنجیرە (8) لەكۆی (16) كەسەكە تۆماركراوە، 10 بڕیار بە كۆی دەنگ دەرچووە كە بڕیارێكی زنجیرە (9)ـی پێدراوە تایبەتە بە بەرزكردنەوەی ئامرلی لە ناحیەوە بۆ قەزا.
لەگەڵ ئەوەشدا دوای بێنەو بەردەو ململانێیەكی سەخت و سازش و سازشكاری لەنێوان ئامۆزاكاندا (ئەبو مازن) گرەوەكەی بردەوەو لە 11/4/2016 لەتێكڕای (29) ئەندامی ئەنجومەنەكە (27) یان ئامادەبوون بەكۆی دەنگ كە هەندێكیان هەردوو دەستیان بەرز كردبووەوە بڕیاردرا بكرێتەوە بە پارێزگاری سەڵاحەدین، بەڵام بۆ ئەوەی ببێتەوە بە پارێزگار پێویستی بە مەرسومی كۆماری دەبێت كە ئەویش بەدەستی كوردە، دەمانتوانی سوودی لێوەربگرین و سازشێكی لەگەڵدا بكەین، بۆ ئەو مەبەستە پەیوەندیم بە هەڤاڵ خالید شوانی كردو پێمڕاگەیاند كە ئەگەری هەیە ئەبومازن و جەماعەتەكەی بە مەبەستی خێرا دەركردنی مەرسومەكە سەردانیان بكەن و داوام كرد پەلە نەكەن لە دەركردنی تا قسەیان لەگەڵ دەكەین بۆ ئەوەی كورد زەرەرمەند نەبێت.
بۆ هەمان مەبەست پێشتر لەگەڵ هەڤاڵ عومەر فەتاح قسەمكرد، كە قسە لەگەڵ هەڤاڵ خالد شوانی بكات، كاك خالد پێیڕاگەیاندم كە كاك عومەر فەتاحیش پەیوەندی پێوە كردووەو هەمان داوای لێكردووە، وتی: ئەبو مازن و جەماعەتەكەی لێرەن پێمڕاگەیاندوون كە رێككەوتن لەگەڵ هەڤاڵانی خورماتوو بكات و واژووی بكات ئەوكات مەرسومی بۆ دەردەكرێت، هەر ئەو ئێوارەیە هەڤاڵانی خورماتوو نووسراوێك دەنێرنە بەغداو ئەبو مازن واژووی دەكات و دواتر لە 12/4/2016 مەرسومی كۆماری بۆ ئەبو مازن وەك پارێزگار دەردەچێت، لە پاداشتی ئەوەش ئەبو مازن دوای ئەوەی خۆی گرت و شوێن پێی خۆی قایم كرد یەكەم كاری بەڕێوەبەری تەندروستی سەڵاحەدینی لادا كە هەڤاڵانی خورماتوو بە هی خۆیانی دەزانن و شەڕی دەستەویەخەیان بۆی كردووە، دواتر لە 4/1/2017 بڕیارەكەی ئەنجومەنی پارێزگای بۆ بە قەزاكردنی ئامرلی دەركرد!!
كەچی تازە بە تازە برادەران خۆیان گیڤ دەكەنەوە وەك ئەوەی ئەمە پرسێكی تازە بێت، بێئەوەی ئاور لە كارە جوانەكانی رابردووی خۆیان بدەنەوە!! سەرباری هەمووی دەیانەوێت كاسەی خۆیان بەسەری پەرلەمانتاراندا بشكێننەوە و داوا لە پەرلەمانتاران دەكەن رێگری لە بە قەزاكردنی ئامرلی بكەن و لە هەمووی سەیرتر ئەو برادەرانە ژێر بەژێر پیروزباییان لێدەكەن!! ئەرێ برادەرینە: ئێوە نەتانوت بەرپرسیارێتی هەڵدەگرین؟؟!
بۆیە بە پێویستی دەزانم داوا لە حزبەكەم و لە هەڤاڵانی مەكتەبی سیاسی و ئەنجومەنی سەركردایەتی و ئەنجومەنی ناوەند بكەم، لەم پرسە بێنە دەنگ و كەمتەرخەم سزا بدەن، ناكرێت مەلا حەسەن دوای ئەوەی ئامرلی كرد بە قەزا، دەستە چەورەكەی بە خەڵكی تر بسڕێتەوەو وەك بەرزەكی بانان بۆی دەرچێت، ناشكرێت لە هەڵەیەكی كوشندەی لەمجۆرە چاو بپۆشرێت، چونكە مەسەلەكە ئەمنی قەومی و پرسی خاكە كە دوو ساڵ و نیوە بە خوێنی پێشمەرگە بەرگری لێدەكرێت و ناكرێت دۆڕاندنی لە سەودایەكی سیاسی بە بێ حیساب تێپەڕێت، چونكە تازە ئامرلی بوو بە قەزاو دژایەتیكردنی لە بەرژەوەندی كورد نییە، بەڵكو ئەوەی گرنگە ئیتر رێگە نەدرێت كەسانێك لە پێناو بەرژەوەندی تایبەتی خۆیاندا قومار بە خاك و چارەنووسمانەوە بكەن.
