بابەکر زێباری : گومان لە سەر کوژرانی دوو فەرماندەی پەسەوانی سنوور و دانەخستنی سنوور لەلایەن تورکیاوە هەیە
بابەکر زێباری، ڕاوێژکاری سەربازیی سەرۆکی ھەرێمی کوردستان، لە لیداونێکدا بۆ ماڵپەڕی فەرمی پارتی دیموکراتی کوردستان گومان دەخاتە سەر چۆن کوژرانی دوو فەرماندەی پاسەوانی سنوور لە لایەن تورکیاوە .
هاوکات پرسیارێک ئاراستەی دەسەڵاتدارانی تورکیا دەکات و دەڵێت ئەوان دوایان لە حکومەتی هەرێمی کوردستان کردووە ، سنوورەکانی بە سەر هێزەکانی پەکەکەدا دابخات ، بەڵام ئەوەی پێویستە سنوور دابخات ، ئەوە تورکیایە نەک هەرێمی کوردستان ، چونکە تورکیا دەوڵەتەو خاوەن دەسەڵاتی سەربازی و چەک و چۆڵی تایبەتی بەرگری و پاراستنی سنوورە ، وەک چۆن بە درێژایی 911 کیلۆمەتر سنووری لە گەڵ سووریا پاراستووە با بەو شێوەش سنووری نیوان هەرێم و تورکیا بپارێزێت کە تەنها 315 کیلۆمەترە .
لە بەشیکی تری قسەکانیدا زێباری گوتی : تورکیا بەبێ ھیچ ڕێککەوتن و ھەماھەنگییەک ھاتووەتە نێو خاکی ھەرێمی کوردستان و تەنانەت ھەماھەنگیی لەگەڵ بەغداش نەبووە، بەڕاستی تورکیا کێشەیە بۆ ئێمە، ئەوان دەڵێن بە بەھانەی ھەبوونی چەکدارانی پەکەکە دێینە ناو خاکی ھەرێمی کوردستان و پێویستە پەکەکە لە ھەرێمی کوردستان نەمێنێت.
سەبارەت بە بوونی هێزەکانی پەکەکە ڕاوێژکاری سەربازیی سەرۆکی ھەرێمی کوردستان ئاماژه به‌وە دەکات ، ئەم کارەی پەکەکە دروست بۆ ئەوەیە هه‌رێمی كوردستان نەمێنێت، ئەمە حەقیقەتە و ئامانجی پەکەکەش ھەر ئەوەیە، کوردستان چوار پارچەیە، خەڵکێک بەبێ خواستی ئێمە، کوردی دابەشی سەر چوار پارچەی کردووە و ئێستاش ئەو خەڵکەی کوردیان پارچە کردووە ماون و پێویستە ئەمە لەبەرچاو بگیرێت.
لە کۆتاییشدا بە پرسیارێکی لۆژیکی گومان دەخاتە سەر چۆنیەتی کوژرانی پاسەوانانی سنووری و گوتی : باشە ئەگەر ھەرێمی کوردستان زانیاریی بە تورکیا داوە بۆ لێدانی پەکەکە، بۆچی فڕۆکەی تورکیا فەرماندەکانی عێراقی کردووەتە ئامانج و چەکدارانی پەکەکەی لەو ناوە بوردوومان نەکردووە، ئەمە جێگەی گومانە، من لە دوای ڕاپەڕینەوە مامەڵەم لەگەڵ پرسی پەکەکە ھەبووە و ئەوەی من زانیومە لە ھەرسێ چەکداری پەکەکە، دوویان سەر بە ھەواڵگری دەوڵەتێکی ئیقلیمی بوونە، ئەمەش کێشەیەکی گەورەیە.
سەبارەت بە هەڵوێستی عێراق بابەکر زێباری ڕای وایە ، عێراق ھەڵوێستێکی لاوازی ھەیە بەرامبەر بە تورکیا لەسەر پێشێلکردنی سەروەریی خاکەکەی، ھەتا لە نەتەوە یەکگرتووەکان سکاڵای تومار نەکردووە و ھەڵوێستی بەلاواز دەبینم.
