مەسرور بارزانی پەیوەندیەکی تەلەفۆنی لەگەڵ سەرپەرشتیاری ئیدارەی گەرمیان ئەنجامدا
بە مەبەستی لە نزیکەوە ئاگادار بوون لە دۆخی دەڤەری گەرمیان و سەرۆکی حکومەت پەیوەندیەکی تەلەفۆنی لەگەڵ سەرپەرشتیاری ئیدارەی گەرمیان ئەنجامداو لە پەیوەندیە تەلەفۆنیەکەدا دەست خۆشی لە بەرپرسانی ئیداره‌ی گه‌رمیانکرد کە لە کاتی دروستبوونی پشێوی و پەلاماردانی دامودەزگاکانی حکومەت و موڵک و ماڵی گشتی و هاووڵاتییان لە سنووری گەرمیان، بەرپرسانە ڕەفتاریان کرد و هەوڵی پاراستنی موڵکی گشتیی و خەڵکیان دا .
ئێوارەی ئەمڕۆ یەکشەممە 2020/8/23 مەسرور بارزانی سەرۆکی حکومەتی هەرێمی کوردستان لە پەیوەندییەکی تەلەفۆنیدا لە گەڵ سەڵاح کوێخا سەرپەرشتیاری ئیدارەی گەرمیان ، بارودۆخ و کێشە و گرفتەکانی سنووری ئیدارەی گەرمیانی تاووتوێ کرد.
سەرۆکی حکومەت دەستخۆشی لە بەرپرسانی دەڤەرەکە کرد کە لە کاتی دروستبوونی پشێوی و پەلاماردانی دامودەزگاکانی حکومەت و موڵک و ماڵی گشتی و هاووڵاتییان لە سنووری گەرمیان ، بەرپرسانە ڕەفتاریان کردووە و هەوڵی پاراستنی موڵکی گشتیی و خەڵکیان دا .
سەرۆکی حکومەت ئاماژەشی بەوەدا ، کە بەداخەوە خەڵکێک هەوڵ دەدات داوای ڕەوای هاووڵاتییان بۆ مەرامی سیاسی و شەخسی خۆی بەکاربهێنێت و هانی خەڵک دەدەن بۆ تێکدان وسووتاندنی موڵکی گشتی و پشێوی نانەوە ، ئەم ڕەفتارانەش بە تاوان دادەنرێن و پێویستە ئەنجامدەرانی، ڕێکاری یاساییان بەرامبەر بگیرێتەبەر.
سەرۆکی حکومەت هەروەها تیشکی خستە سەر دۆخی نەخوازراوی تەندروستی و قەیرانی دارایی، کە لە دەرەوەی خواست و ویستی حکومەتی هەرێمی کوردستانە و ئاماژەی بەوەدا تێپەڕاندنی ئەم دۆخە، هەماهەنگیی و هاوکاری هەموولایەکی پێویستە.
