داستانی خواکورک.. هەوێنی راپەڕین و وه‌ستانه‌وه به رووى زوڵم و ستەم
سی و دوو ساڵ بەر لە ئەمڕۆ و له رۆژى 5ی ئەیلوولى ساڵى 1988، پاش 46 رۆژ لە خۆڕاگری هێز پێشمەرگەی کوردستان، داستانی خواکورک تۆمار کرا.
داستانی خواکورک لە داستانە بەناوبانگەکانی هێزی پێشمەرگەی کوردستانە، کە هێزی پێشمەرگەی کوردستان بەسەرکردایەتی راستەوخۆی سەرۆک مەسعوود بارزانی، توانی چۆک بە سوپای عێراقی ئەوکات دابدات، کە بە پێنجەمین سوپای جیهان دادەنرا.
سوپای بەعسی گۆڕبەگۆڕ لە 19ی تەمووزی 1988، ھێرشێکی بەرفراوانی بۆ سه‌ر ناوچە رزگارکراوەکانی کوردستان لە دەڤەری خواکورک دەست پێکرد. لەو هێرشه‌دا سوپای بەعس بە بەشداری زیاتر لە پازدە لیوای سەربازیی، تۆپخانە و فڕۆکەی جەنگيی و، تەنانەت چەکی کیمیاییشی بەکارھێنا.
سەرەڕای هێزی نابەرابەر، پێشمەرگە دلێر و گیان لەسەردەستەکانی کوردستان، توانیيان زیانێکی زۆر بە ھێزە ھێرشکارەکەی رژێمی بەعس بگەیەنن.
شەڕەکە لەڕووی سیاسی و سەربازیی و ستراتیجییەوە، بایەخێکی مەزنی ھەبوو، چونکە پێشمەرگە له‌ڕووى سه‌ربازييه‌وه توانی دەسکەوتێکی زۆر لە چەک و تەقەمەنی بەدەستبهێنێ، لەڕووی سیاسیشەوە لە گۆڕنانی ئەو خەونەی بەغدا بوو، کە باوەڕی وابوو بەکۆتایيهاتنی جەنگی عێراق- ئێران، گيانى بەرگری نه‌ته‌وه‌ى كورد و شۆڕشی کوردستانیش لەناو دەچێ، بەڵام بەرگری پێشمەرگەى كوردستان لە خواکورک خەونەکانی رژێمی بەعسی لە گۆڕنا.
سەرۆک مەسعوود بارزانی لە سەنگەرەکانی شەڕی خواکورکدا، لە وتارێکیدا بۆ پێشمەرگە قارەمانه‌کانی بەشداربووی ئەو داستانە ئاماژەی پێدا كه لە ماوەیەکی زۆر نزیکدا بارودۆخی ناوخۆى عێراق گۆڕانی بەسەردا دێت و دوژمن ناچار دەبێ لە بەرامبەر ئەم جۆرە بەرگرییەی پێشمەرگەدا بەخۆیدا بچێتەوە.
داستانی خواکورک بوو به هەوێنێک بۆ گیانی بەرگری و وه‌ستانه‌وه به رووى زوڵم و ستەمی رژێمی بەعس و راپەڕینه شکۆدارەکەی ئاداری ساڵى 1991ى لێ هاتە بەرهەم.
