لەسەر راسپاردەی سەرۆكی حكوومەت كۆمەڵێك پڕۆژە لە سۆران جێبەجێ دەكرێن
قایمقامی شارۆچکەی سۆران ئاشكرای دەكات، لەسەر راسپاردەی سەرۆكی حكوومەت، لە سۆران كۆمەڵێك پڕۆژەی جۆراوجۆر جێبەجێ دەكرێن كە بە گوژمەی زیاتر لە 15 ملیار دینار دەبن.
كرمانج عزەت قایمقامی قەزای سۆران رایگەیاند، لەسەر راسپاردەی سەرۆكی حكوومەتی ھەرێمی كوردستان، لەلایەن پارێزگاری ھەولێر ئاگادار كراوینەتەوە كە پلانی خۆمان بۆ ئەنجامدانی پڕۆژە لە سۆران و دەوروبەری ئامادە بكەین.
زیاتر روونی دەكاتەوە، پێمان راگەیەنراوە ئەو پڕۆژانەی تەواو نەكراون و ئەوانەش پێویستیمان پێیان ھەیە، ئامادەی بكەین و ئێستە خەریكی ئامادەكردنی پڕۆژەكانین و تا رۆژی پێنجشەم كارەكانمان تەواو دەبێت.
قایمقامی سۆران دووپاتی دەكاتەوە، ئەو پڕۆژانەی ئامادە دەكرێن تێچووەكەیان سەرووی 15 ملیار دینار دەبێت و لە ھەموو سێكتەر و ناوچەكانیش دەبێت و ئەولەویەتیش بۆ ئەو پڕۆژانە دەبێت كە تەواو نەكراون.
