وەزیری تەندروستی لەبارەی وێنەیەکی لە ڕیفراندۆمدا ڕونکردنەوە دەدات

وەزیری تەندروستی هەرێم لەبارەی هەندێک وێنەیەوە کە لە سێهەمین ساڵیادی ڕیفراندۆمەکەی هەرێمی کوردستان بڵاوبویەوە ڕونکردنەوە دەدات و ڕایدەگەیەنێت، وێنەکە هی سێ ساڵ پێش ئێستایە.

سامان بەرزنجی، وەزیری تەندروستیی حكومه‌تی هەرێمی كوردستان، چەند وێنەیەکی لە تۆڕە کۆمەڵایەتییەکان بڵاوکرایەوە لەناو ئاپۆڕەی خەڵکیدا، بەکارهێنەرانی تۆڕە کۆمەڵایەتییەکان ڕەخنەی ئەوەیان گرت کە چۆن وەزیری تەندروستی بێ گوێدانە ڕێکارەکانی خۆپارێزی تێکەڵی خەڵکی بووە.

ده‌قى ڕوونكردنه‌وه‌كه‌:

سەبارەت بە بڵاوبوونەوەی وێنەیەكی بەڕێز وەزیری تەندروستی لەناو ئاپۆڕای جەماوەر لە چەند پەیج و ئەكاونتێكی ڕۆژنامەوانی كە بە هەڵەدا چوونە، گوایە ئەم وێنەیە نوێ یە و بێ خۆپارێزی تەندروستییە.

لێرەوە بۆ ڕای گشتی ڕادەگەیەنین كەوا ئەم وێنەیە سێ ساڵ پێش ئێستایە لەكاتی شەوی ئاهەنگی كردنەوەی كەرنەڤاڵی ڕیفراندۆم لە ناو سەنتەری شاری هەولێر لە ڕێكەوتی 5-9-2017 هەروەک لە وێنەکەشدا دیارە لەو کاتیشدا بڵاوکراوەتەوە.

ساڵانە یادكردنەوە و بڵاوبوونەوەی ئەم وێنانەی یادگاری، وێرای ئەوەی شانازیەكی گەورەی هەموو بەشداربووانی ڕیفراندۆمە لەهەمان کاتدا مێژوویەكی مەزن و خۆشحاڵی بەردەوامە بۆ ئەو یادەوەریانە، بەڵام بەداخەوە هەندێك لە پەیجی میدیایی بەبێ وردبوونەوە و بەدواداچوون لەم بابەتانە بۆ بەلاڕێدابردن دەبنە هۆكاری كەمبوونەوە و نەمانی متمانەی هاووڵاتیان بەم پەیجانە.

جارێكی تر سڵاو لە بەشداربووانی ئەو مێژووە پڕ سەروەریە و ڕۆژە مەزنەكەی ڕیفراندۆم.

سکرتێری ڕۆژنامەوانیی وەزیری تەندروستی
26 ئەیلول 2020