نوێنەری مەسیحییەكان: دەمانەوێ حكوومەتی هەرێمی ئیدارەی ناوچەكانمان بدات نەك بەغدا

خواكوڕك

دوای كۆنتڕۆلكردنەوەی ناوچە مەسیحی نشینەكانی دەشتی نەینەواو لە لایەن پێشمەرگەی كوردستان‌و سوپای عێراق, بەڕێوەبەری كاروباری مەسیحییەكان لە وەزارەتی ئەوقاف و كاروباری ئایینی حكوومەتی هەرێمی كوردستان دەڵێ، مەسیحییەكان لەگەڵ ئەوەدان كە ناوچەكانیان بكرێ بە پارێزگا و لە ژێر دەستەڵاتی هەرێمی كوردستاندا ئیدارەبدرێ نەوەك لەگەڵ عێراقدا بمێننەوە.

(خالد جەمال) بەرێوبەری كاروباری مەسیحییەكان لە وەزارەتی ئەوقاف و كاروباری ئایینی حكوومەتی ھەرێمی كوردستان بە ماڵپەڕی فەرمیی پارتی دیموكراتی كوردستانی راگەیاندووە، لە دوای دەستپێكردنی پرۆسەی رزگاركردنی مووسڵ تا ئێستا نۆ ھاوڵاتی مەسیحی لەدەستی داعش رزگاركراون كە ئەمانە لەكاتی ھاتنی داعش لە سنووری مووسڵدا مابوون و نەیانتوانی بوو رابكەن و لە ماوەی رابردوودا توانراوە رزگار بكرێن.

(خالد جەمال) دەشڵێ، ناوچەی مەسیحینشین لە سنووری مووسڵدا زۆرینەی تێكدراون و خاپوور كراون، بۆیە مەسیحییەكان بۆ گەڕانەوەیان مەرجی خۆیان هەیە و دەیانەوێ ئەو ناوچانی كە پێشووتر لێی نیشتەجێبوون لە سنووری مووسڵدا بكرێ بە پارێزگا و لێی پارێزراو بن و خۆیان بڕیار لە ئیدارەی ناوچەكانیان بدەن.

ئەو نوێنەرەی مەسیحیان ئاماژە بەوەی كە خەڵكی مەسیحی بەڵگەی زۆریان لایە لەكاتی ئازادكردنی ناوچەكانیان ماڵەكانیان تاڵان كراوە، بەتایبەت لەو ناوچانەی كە هێزە عێراقییەكان ئازای كردوون وەك ناوچەكانی بەرتلە و ئەلقووش، بەڵام ئەو ناوچانەی كە لەژێر دەستی داعشدا بوون وەك باشیك و ناوچەكانی دیكە هیچ دەستكارییان نەكراوە، چونكە پێشمەرگە پارێزگاری لێ كردوون، هاوكات جەخت دەكاتەوە، ”مەسیحییەكان لەگەڵ ئەوەدان كە ناوچەكانیان لە ژێر دەستەڵاتی هەرێمی كوردستاندابێ نەوەك لەگەڵ عێراقدا بمێننەوە، چونكە ئەزموونی زۆریان لەگەڵ هەرێمی كوردستان هەیە و هەست بە ئارامی دەكەن.”