باڵیۆزی بریتانیا لە عێراق دەستخۆشی لە ڕێككەوتنی ئاساییكردنەوەی بارودۆخی شنگال كرد
ڕۆژی چوارشەممە 14ـی تشرینی یەكەمی 2020 لە سەلاحەددین سەرۆك مەسعود بارزانی پێشوازی لە ستیڤێن هیكس باڵیۆزی بریتانیا لە عێراق كرد.
لە دیدارەكەدا بارودۆخی سیاسی و ئەمنی و ئابووریی عێراق و لێكەوتەكانی پەتای كۆرۆنا لەسەر ژیانی گشتی لە هەرێمی كوردستان و عێراقی فیدڕاڵ تاوتوێ كرا. هەروەها ڕۆشناییش خرایە سەر مەترسییەكانی تیرۆر و ئەو تەحەددیاتەی ڕووبەڕووی پڕۆسەی سیاسیی عێراق و هەرێمی كوردستان دەبنەوە.
هەر لەو دیدارەدا باڵیۆزی بریتانیا لە عێراق دەستخۆشی لە ڕێككەوتنی ئاساییكردنەوەی بارودۆخی شنگال كرد كە لەنێوان حكوومەتی فیدڕاڵی عێراق و حكوومەتی هەرێمی كوردستان بەستراوە و هیوای ئەوەی خواست ئەو ڕێككەوتنە جێبەجێ بكرێت. پەیوەست بەم بابەتەوە سەرۆك بارزانی پاڵپشتیی خۆی بۆ حكوومەتەكەی مستەفا كازمی و ڕێككەوتنی شنگال دووپات كردەوە و ئەوەشی خستەڕوو كە پێویستە ئەو تەحەددیاتە نەمێنن كە ڕێگرن لەبەردەم جێبەجێكردنی ڕێككەوتنی شنگال و گەڕانەوەی ئاوارەكان.
هەڵبژاردنەكانی داهاتووی عێراق تەوەرێكی تری ئەو دیدارە بوو.
