ئەرشیڤی ئەنفالی کورد ڕادەستی بەغدا دەکرێتەوە
لە لێدوانێکیدا بۆ رۆژنامەی سەباحی نیمچە فەرمی عێراقی ، ئەمڕۆ پێنجشەممە نۆفەل ئەبو رغیف، بریکاری وەزارەتی رۆشنبیریی عێراق ئاشکرای دەکات ، ئەمریکا پێنج ئەرشیڤی تایبەتی سەردەمی سەدامی لە بەر دەستە
ئەو ئەرشیڤانە تایبەتن بە نهێنی ژێرزەمینەکانی بەعس و زیندانیانی سیاسی و هەموو ئەوانەی وا بە نهێنی لە گۆڕ نراون و ئیعدام کراون و هەروەها ئەرشیڤی تایبەتی ئەنفال و بە گشتی ئەرشیڤی ئیستیخباراتی بەعسن .
نۆفەل ئەبو رغیف، بریکاری وەزارەتی رۆشنبیری لە دوای ئاشکرا کردنی ئەم بابەتە گوتی ئەمریکا لە ئێستادا دەیەوێت ئەو ئەرشیڤانە ڕادەستی بەغدا بکاتەوە کە یەک لە هەرە گرینگترینیان ئەرشیڤی ئەنفالی کوردەکانە .
جێگەی ئاماژە یە ئەمریکا لە کاتی هاتنە سەر کاری مستەفا کازمی بەشێکی گرنگی ئەرشیڤی تاوانەکانی سەردەمی بەعسی ڕادەستی مستەفا کازمی کرد کە لە ساڵی 2005 وە دەستی بەسەردا گرتبوو ، چاودێرانیش پێیان وایە ڕادەستکردنی ئەو ئەرشیڤە بە عێراق دەتوانێت ئەرێنی و نەرێنی بێت لە سەر پێوەندییەکانی کورد و بەغدا
