سه‌رۆکی هه‌رێمی كوردستان پێشوازی له باڵیۆزی هندستان له عێراق کرد
سه‌رله‌به‌یانیی ئه‌مڕۆ یه‌كشه‌ممه 18/10/2020 به‌ڕێز نێچیرڤان بارزانی سه‌رۆكی هه‌رێمی كوردستان پێشوازی له به‌ڕێز بیرەندەر سینگ یاداڤ باڵیۆزی هندستان له عێراق كرد.
له كۆبوونه‌وه‌یه‌كدا په‌یوه‌ندییه‌كانی هندستان له‌گه‌ڵ عێراق و هه‌رێمی كوردستان، دۆخی عێراق به‌گشتی، په‌یوه‌ندییه‌كانی هه‌ولێر ـ به‌غدا، گفتوگۆی چاره‌سه‌ركردنی كێشه‌كانیان، په‌تای ڤایرۆسی كۆرۆنا و لێكه‌وته‌كانی و دۆخی ڕه‌وه‌ندی هندی له هه‌رێمی كوردستان خرانه به‌ر باس و گفتوگۆ.
هه‌ردوولا جه‌ختیان له پته‌وكردنی په‌یوه‌ندییه ئابوورییەکان و فراوانكردنی قه‌بارەی بازرگانیی هندستان لەگەڵ عێراق و هەرێمى کوردستان كرده‌وه و له‌مباره‌یه‌وه سه‌رۆك نێچیرڤان بارزانی دووپاتی كرده‌وه كه كه‌رتی تایبه‌تی هندی ده‌توانێت وه‌به‌رهێنان و سه‌رمایه‌گوزاری له هه‌رێمی كوردستان بكات و هه‌موو ئاسانكاری و پشتگیرییه‌كیان ده‌بێت.
