وه‌زاره‌تی گواستنه‌وه و گه‌یاندن سزای شۆفێری ئەو ئۆتۆمبێلە دەدەین کە سەرپێچی ئەنجامداوە
دوای ئەوەی ئۆتۆمبێلێکی سەربەوەزارەتی گواستنەوەو گەیاندن لە تۆڕەکۆمەڵایەتیەکان وێنەی بڵاوکرایەوە، کە هاناری دەگواستەوە، وەزارەتی گواستنه‌وه و گه‌یاندن رایگەیاند کە سزای شۆفێری ئۆتۆمبێلەکە دەدەن.
وه‌زاره‌تی گواستنه‌وه و گه‌یاندن له ڕوونكردنه‌وه‌یه‌كدا رایگەیاندووە: له دوای بڵاوبوونەوەی وێنەی ئۆتۆمبیلی ژمارە (43- گواستنەوە و گەیاندن) لە رۆژی هەینی 30-10-2020 له‌سۆسیال میدیاكاندا كاتێك فەرمانبەر (ئا. م. خ ) به‌ده‌ر لە رێنماییەكانی حكومەت ئۆتۆمبیلەكەی بەكارهێنابوو، دەستبەجێ بە بڕیاری وەزارەت ئۆتۆمبیلەكە لە فه‌رمانبه‌ری بەكارهێنەر وەرگیرایەوەو گەڕێندرایەوە بۆ ناو فه‌رمانگه‌ی بەڕێوەبەرایه‌تیه‌كەی و رۆژی یەكشەممەش ٢٠٢٠/١١/١ له كاتی دەوامی فەرمیدا فەرمانبەری ئاماژەپێكراو لێپرسینه‌وه‌ی یاسایی پێویستی له‌گه‌ڵ ئەنجامدەدرێت.
وه‌زاره‌تی گواستنه‌وه و گه‌یاندن ڕاشیگه‌یاند: هه‌روه‌ها به‌پێویستی دەزانین ئەوەش روونبكەینەوە ئەو ئەفسەرەی هاتوچۆ كە وێنەكەی بڵاوكردۆتەوە، له بنه‌ماكانی ئەركی پیشەییانه‌ی خۆی لایداوه، چونكە ئەو كارە دوورە لە رەوشت و ئیتیكی پیشەیی، دەكرا بە شێوەی نووسراوی فەرمی سەرووی خۆی له‌لایه‌نه په‌یوه‌ندیداره‌كان لەم سەرپێچیه ئاگاداربكردبایه‌وه بۆ گرتنه‌به‌ری رێوشوێنی یاسایی پێویست.
له‌گه‌ڵ رێزدا.
حكومه‌تی هه‌رێمی كوردستان
وه‌زاره‌تی گواستنه‌وه و گه‌یاندن.
