ڕێواز فایەق: سبەی سێ سەرۆكایەتییەكەی هەرێمی كوردستان و لایەنە سیاسییەكان كۆدەبنەوە
سەرۆكی پەرلەمانی كوردستان ڕای دەگەیەنێت، بڕینی بەشە مووچەی هەرێمی كوردستان لەلایەن عێراقەوە دەبێت قسەی رژدی لەسەر بكرێت و باس لە چارەسەرەكان بكرێت.
ئەمڕۆ شەممە ١٤ی ١١ی ٢٠٢٠، ڕێواز فایەق سەرۆكی پەرلەمانی كوردستان لە كۆنگرەیەكی ڕۆژنامەوانیدا ڕایگەیاند، سبەی سێ سەرۆكایەتییەكی هەرێمی كوردستان كۆ دەبنەوە و سەرجەم حزبە سیاسییەكان بەشداریی كۆبوونەوەكە دەكەن.
باسی لەوەش كرد، بڕینی بودجە و مووچەی كوردستان دەبێت گفتوگۆی رژدی لەسەر بكرێت و باس لە چارەسەرەكان بكەین و هەوڵ بدەین دۆخەكە بەرەو چاكبوون بێت.
سەرۆكی پەرلەمان گوتی، ئەو بابەتە پێوەندی بە دانیشتووانی هەرێمی كوردستان هەیە، بۆیە دەبێت پەرلەمانی كوردستان لەسەر ئەو بابەتەش كۆبوونەوە بكات.
ڕوونی كردەوە، لە كۆبوونەوەی سبەی هەوڵ دەدەین ئەو بابەتە بەرەو چارەسەر ببەین و ناكرێت لە عێراق مووچەی دوو مانگ بدرێت و لە هەرێمی كوردستان مووچە نەدرێت و بودجەی فەرمانبەران ڕابگیرێت.
