چه‌ند بڕیارێكی نوێ له ژووری ئۆپه‌راسیۆنی پارێزگای هه‌ولێره‌وه
دوای ئه‌وه‌ی له ماوه‌ی رابردوو ئه‌نجومه‌نی پارێزگای هه‌ولێر له پێناو كۆنتڕۆلكردنی ڤایرۆسی كۆرۆنا چه‌ند جارێك كۆبووه‌و چه‌ند بڕیارێكی ده‌ركرد، ئه‌مرۆ جارێكی دیكه ئه‌نجومه‌نی پارێزگای هه‌ولێر بۆهه‌ڵسه‌نگاندن بۆ دۆخی كۆرۆنا له سنووری ئه‌و پارێزگایه و كۆبووه‌وه و دوای كۆبوونه‌وه‌كه‌ش له به‌یاننامه‌یه‌كدا ژماره‌یه‌ك بڕیاری نوێی بۆ رووبه‌ڕووبوونه‌وه‌ی ئه‌و په‌تایه راگه‌یاند.
ده‌قی به‌یاننامه‌كه‌ی ژووری ئۆپه‌راسیۆنی پارێزگای هه‌ولێر:
ئێوارەی ئەمڕۆ سێشەمە 2020/11/17، به‌سه‌رپه‌رشتی هێمن قادر، پارێزگاری هەولێر بەوەکالەت و ئامادەبوونی عەلی رەشید، سەرۆکی ئەنجومەنی پارێزگای هەولێر و تەواوی ئەندامانی ژووری ئۆپەراسیۆن، ژووری ئۆپەراسیۆنی پارێزگای هەولێر بۆ بەرەنگاربوونەوەی ڤایرۆسی کۆرۆنا، لەدیوانی پارێزگا کۆبووە و گەیشتنە ئەم بڕیارانەی خوارەوه:
یەکەم/ ژووری ئۆپەراسیۆنی پارێزگای هەولێر بۆ بەرەنگاربوونەوەی ڤایرۆسی کۆرۆنا، سوپاس و ستایشی دانیشتوانی سنووری پارێزگای هەولێر دەکات، کە لەماوەی دوو هەفتەی رابردوودا بەهۆی پابەندبوونیان بە رێنماییە تەندروستییەکان و رێکارەکانی خۆپارێزی، تاڕادەیەك توانراوە لە سنووری پارێزگاکەمان بەشێوەیەك رێژەی تووشبوون بەکۆرۆنا کەمبێتەوە، ئەمەش مایەی خۆشحاڵییە، بۆیە تکا لەهاووڵاتیانی شارەکەمان دەکەین، پابەندی بڕیار و رێنماییە تەندروستیی و رێکارەکانی خۆپارێزی بن و زۆر هەستیارانە مامەڵە بکەن و خۆیان بەدووربگرن لە شوێنە قەرەباڵغەکان و دەمامك ببەستن، لەپێناو پاراستنی ئاسایشی تەندروستیی شارەکەمان و سەلامەتی گیانی هاووڵاتیانی، هەروەها سوپاس و ستایشی یەکە کارگێڕییەکان، تیمەکانی تەندروستی، شارەوانییەکان، هێزەکانی (پۆلیس، ئاسایش، زێرەڤانی، هاتووچۆ) دەکەین، کە جوامێرانە لەپێناو پاراستنی ئاسایشی تەندروستی شارەکەمان و جێبەجێکردنی رێکارەکانی خۆپارێزی لە کۆرۆنا و سەلامەتی گیانی هاووڵاتیانی شارەکەمان لەئەرکدا بوونە.
دووەم/ داوا لەسەرجەم هاووڵاتیانی سنووری پارێزگای هەولێر دەکەین، بەو پەڕی هەستکردن بە بەرپرسیاریەتی لەم بارودۆخەدا، لەپێناو سەلامەتی خۆیان و ئازیزانیان پابەندبن بەڕێنماییە تەندروستییەکان و رێکارەکانی خۆپارێزی لەکۆرۆنا، بەتایبەتی بەستنی (دەمامك)، هەرکەسێك رەچاووی بەستنی (دەمامك) و رێکارەکانی خۆپارێزی لەڤایرۆسی کۆرۆنا نەکات، رووبەڕووی رێکاری یاسایی دەبێتەوە.
سێیه‌م/ داوا لەمامۆستایانی ئاینی و پێشنوێژی مزگەوتەکان دەکەین، لە جێبەجێکردنی رێنماییە تەندروستییەکان و رێکارەکانی خۆپارێزی به‌م شێوه‌یه هاوکارمانبن:
- بەهیچ شێوەیەك نوێژخوێن نابێت منداڵ لەگەڵ خۆی ببات بۆ ناو مزگەوت.
- رێگە نەدەن نوێژخوێن بەهیچ شێوەیەك بەبێ بەستنی (دەمامك) و بەرماڵی تایبەتی خۆی بۆ نوێژکردن بڕواتە ناو مزگەوت.
هەر مزگەوتێك پابەند نەبێت، بەپێی ئەو دەسەڵاتەی پێماندراوە دادەخرێت.
چواره‌م/ (نۆڕینگە، سەنتەر و کۆمەڵگا پزیشکییەکان، نەخۆشخانە ئەهلییەکان) و هەموو ئەو هاووڵاتیانەشی بەمەبه‌ستی چارەسەر سەردانیان دەکەن، دەبێت پابەندی جێبەجێکردنی رێنماییە تەندروستییەکان و رێکارەکانی خۆپارێزی لەکۆرۆنا بن، بەتایبەتی بەستنی (دەمامك)، هەرشوێنك پابەند نەبێ، رێکاری یاسایی لەبەرمبەردا دەگیرێتەبەر و شوێنەکە بە پێبژاردن و داخستن سزادەدرێت.
پێنجه‌م/ هەموو ئەو شوێنانەی کراوەن، (مۆڵ، مارکێت، شوێنە بازرگانیەکان، بازاڕ، چێشتخانه)، پێویستە تەواوی مەرجە تەندروستییەکان و رێکارەکانی خۆپارێزی جێبەجێبکەن لە بەستنی (دەمامك، دووری مەودای نێوان هاوڵاتییان، دروست نەکردنی قەرەباڵغی، دانانی هێمای نۆرەی هاووڵاتیان لەسەر زەوی بەتایبەتی لای کاشیری مۆڵ و مارکێتەکان و پێشوازی هوتێل و موتێلەکان)، هه‌رشوێنێك ئەم رێنماییانە بەتایبەتی بەستنی (دەمامك) جێبه‌جێ نه‌كات، لێژنەی قایمقامیەتەکان، تیمەکانی تەندروستی، شارەوانی، چاودێری بازاڕ، هێزە ئەمنییەکان راسپێردراون، ده‌ستبه‌جێ شوێنەکە دادەخەن.
شه‌شه‌م/ (پێشانگاکانی ئۆتۆمۆبێل، بازاڕە میللییەکان، گۆڕەپانەکانی باڵندە، هاوینە هەوارەکان، شوێنە گەشتیاری و گەشتیارەکانیان) دەبێت رەچاووی رێنماییە تەندروستییەکان و رێکارەکانی خۆپارێزی بکەن و پابەندبن بە بەستنی (دەمامك)، هەرشوێنك پابەند نەبێت، رێکاریی یاسایی لەبەرامبەردا دەگیرێتەبەر.
حه‌فته‌م/ بۆ چاودێریکردن و جێبەجێکردنی رێنماییە تەندروستییەکان و رێکارەکانی خۆپارێزی لە کۆرۆنا لە شوێنە گشتییەکانی (کۆمەڵگا، قەزا، ناحییەکان)ی سنووری پارێزگای هەولێر، مەفرەزەی گەڕۆك لە هێزە ئەمنیەکان پێکهێنراوە، هەر کەس و لایەنێك پابەند نەبێت، رێکاری یاسایی لەبەرامبەردا دەگێرێتەبەر.
هه‌شته‌م/ هۆشداری دەدەینە سەرجەم شۆفێرانی (تەکسی، تایبەت، پاس، مینی پاس) پابەندی رێناماییە تەندروستییەکان بن و خۆیان و سەرنشینەکانیان (دەمامك) ببەستن، هەر کەسێك سەرپێچی لەم بڕیارە بکات، لەلایەن پۆلیسی هاتووچۆ رێکاریی یاسایی لەبەرامبەردا دەگیرێتەبەر بە پێبژردن و دەستبەسەرداگرتنی ئۆتۆمبێلەکەی.
نۆیه‌م/ ئەم شوێنانە بەداخراوی دەمێنەوە:- (هۆڵه‌كانی بووك گواستنه‌وه، هه‌موو جۆرە گردبوونەوە و کۆنفرانس و کۆبوونەوەیەك).
ده‌یه‌م/ ئەم شوێنانە لە کاتژمێر (12:00)ی شەو دادەخرێن:- (یانه‌ی شه‌وانه، نێرگه‌له‌كێشان، یانه‌كانی مه‌ی خواردنه‌وه (باڕ)، لایف میوزیك، ئاهه‌نگی شه‌وانەی یانەکان).
یازده‌هه‌م/ (پرسەدانان لە (هۆڵ، ماڵ، ژێر چادر، مەراسیمی سەرقەبران) قەدەغەیە، بنکەی پۆلیس و موختاری گەڕەك بەرپرسیارن، هەرکەسێك پابەند نەبێت، بەپێی بەیانی ژمارە (52)ی ساڵی 2020ی وەزارەتی ناوخۆی حکومەتی هەرێمی کوردستان، رێکاریی یاسایی لەبەرامبەردا دەگیرێتەبەر.
دوازدەهەم/ سەرجەم بازگەکانی سنووری پارێزگای هەولێر ئاگادار دەکەینەوە، رێگە بەهیچ گروپێکی گەشتیاری و کەسێك نادرێت بەبێ بەستانی (دەمامك) داخڵی سنووری پارێزگای هەولێر بێت، بەپێچەوانەوە رێکاری یاسایی لەبەرامبەر کۆمپانیا گەشتیارییەکان دەگیرێتەبەر.
سێزده‌هەم/ سه‌رجه‌م فه‌رمانبه‌رانی فه‌رمانگه‌كان ده‌بێت (ده‌مامك) ببه‌ستن، هه‌ر فه‌رمانبه‌رێك له كاتی ده‌وام (ده‌مامك)ی نه‌به‌ستابێت رێكاری كارگێری به‌رامبه‌ری ده‌گیرێته به‌ر، هیچ هاووڵاتییه‌ك و موراجعێك بۆ راییکردنی مامەڵەکانییان به‌بێ به‌ستنی (ده‌مامك) بۆی نییه بچێته ناو هیچ فه‌رمانگه‌یه‌ك، بە پێچەوانەوە بەرپرسی فەرمانگەکە رووبەڕووی رێکاری یاسایی دەبێتەوە.
ژووری ئۆپەراسیۆنی پارێزگای هەولێر
2020/11/17
