دهۆک و سلێمانی ماتەمینی بۆ کۆچی فرسەت سۆفی دەردەبڕن
دوای ئەوەی هەواڵی کۆچی دوایی فرسەت سۆفی پارێزگاری هەولێر بڵاو کرایەوە، هەردوو پارێزگاری دهۆک و سلێمانی ماتەمینیی خۆیان بۆ کۆچی پارێزگار دەربڕی.
هەڤاڵ ئەبوبەکر پارێزگاری سلێمانی پەیامێکی بۆ کۆچی دوایی فرسەت سۆفی پارێزگاری هەولێر بڵاو کردەوە، تێیدا دەڵێ، پرسە، پەژارە، خەم و ماتەمینیی خۆمان بۆ کۆچی جوانەمەرگانەی برا هاوڕێ، هاوکار، ئازیز و بەڕێزمان دکتۆر فەرسەت سۆفی پارێزگاری هەولێری پایتەختی هەرێمی کوردستان دەردەبڕین.
زیاتر نووسیویەتی، داواخوازین خودای گەورە ئارامیی بە هەموو لایەکمان ببەخشێت و ڕۆحی بەڕێزیان شادبێت.
هەروەها عەلی تەتەر پارێزگاری دهۆک پەیامێکی سەرەخۆشیی بڵاو کردووەتەوە، تێیدا دەڵێ: بەداخەوە هاوڕێ و برای بەڕێزمان، فرسەت سۆفی پارێزگاری هەولێرمان لەدەست دا کە کەسێکی خاکی و خۆشەویست و ڕاستگۆ و ماندوونەناس بوو.
لە پەیامەکەیدا ئەوەش هاتووە، سەرەخۆشی نەک تەنیا لە کەسوکاری کۆچکردوو و هاووڵاتییانی پارێزگای هەولێر، بەڵکو لە هەموو کوردستانیان دەکەم، چونکە ئێمە کەسێکی پاک و ڕاستگۆمان لەدەست داوە، جێگەی بەهەشت و ڕۆحی شاد بێت.
دوای مانگێک لە تووشبوونی فرسەت سۆفی پارێزگاری هەولێر بە نەخۆشیی ڤایرۆسیی کۆرۆنا، بەرەبەیانی ئەمڕۆ چوارشەم 18ی تشرینی دووەم، لە یەکێک لە نەخۆشخانەکانی تورکیا گیانی لە دەست دا.
