وه‌زیری ده‌ره‌وه‌ی سعودیه ره‌تی ده‌كاته‌وه كه ناته‌نیاهۆ سه‌ردانی وڵاته‌كه‌یانی كردبێت
دوای ئه‌وه‌ی رادیۆی ئیسرائیل و ماڵپەڕی “وایلا”ی هەواڵی ئیسرائیل رایانگه‌یاند كه هه‌ریه‌كه له بنیامین ناته‌نیاهۆ سه‌رۆك وه‌زیرانی ئیسرائیل و یوسی کۆهین سەرۆکی دەزگای هەواڵگر ئیسرائیل سه‌ردانی وڵاتی سعودیه‌یانكردووه، وەزیری دەرەوەی سعودیە ڕەتیکردەوە، هیچ دیدارێک لە نێوان محەمەد سەلمان جێنشینی سعودیە و لێپرسراوانی ئیسرائیلی، لە کاتی سەردانەکەی وەزیری دەرەوەی ئەمریکا بۆ ڕیاز.
فەیسەڵ بن فەرحان وەزیری دەرەوەی سعودیە لە تویتیکدا لە تۆڕی کۆمەڵایەتی تویتەر رایگه‌یاندووه كه هیچ کۆبوونەوەیەکی لەو شێوەیە ڕووی نەداوە، وەک ئاماژەیەک بۆ ئەو هەواڵەی کە میدیای ئیسرائیل بڵاوینکردووە و باس لە سەردانێکی نهینی بنیامین نەتەنیاهۆ سەرۆک وەزیرانی ئیسرائیل دەکات بۆ سعودیە و کۆبوونەوەی لەگەڵ محەمەد سەلمان جێنشینی پادشای سعودیە.
وەزیری دەرەوەی سعودیە ئاماژەی بەوەشکردووە، سەرجەم ئەو لێپرسراوانەی کە ئامادەی دیداری سەردانەکەی مایک پۆمپیۆ وەزیری دەرەوەی ئەمریکا بوون لە سعودیە، سەرجەمیان سعودی و ئەمریکی بوون.
ئەوەش لە کاتێکدایە، میدیاکانی ئیسرائیل بڵاویانکردەوە دوو ڕۆژ لەمەوبەر بنیامین ناتەنیاهۆ سەرۆک وەزیرانی ئیسرائیل، بە نهێنی سەردانی سعودیەی کردووە و لەگەڵ محەمەد سەلمان جێنشینی پادشای سعودیەدا کۆبووەتەوە .
