راوێژکاری سەربازی خامەنەیی بەربژێرە بۆ سەرۆک کۆماری داهاتووی ئێران
![](https://xwakurk.com/wp-content/uploads/2020/11/B267BA19-9217-4EE7-850D-08B139704268.jpeg)
لەگەڵ نزیک بوونەوەی وادەی هەڵبژاردنی سەرۆکایەتی ئێران، ئەگەرچی تا ئێستا هیچ کەسایەتی سیاسی و سەربازی خۆیان بۆ ئەو پۆستە بەربژێر نەکردووە بەڵام وەزیری پێشووی بەرگری ئێران و ڕاوێژکاری باڵای سەربازیی ئێستای عەلی خامنەئی ڕابەری باڵای ئێران خۆی وەک بەربژێر راگەیاند.
تەلەفزیۆنی بی بی سی فارس رایگەیاندووە حسین دەهقان وەزیری پێشووی بەرگری ئێران و ڕاوێژکاری باڵای سەربازیی ئێستای عەلی خامنەئی ڕابەری باڵای ئێران ڕایگەیاندووە “ئامادەکاری خۆم دەردەبڕم بۆ بەشداری لە هەڵبژاردنی سەرۆکایەتی ساڵی ٢٠٢١دا و دەستدەکەم بە جێبەجێکردنی گەشە و پەرەپێدان بە کەمترین تێچوون”.
هەروەها راشیگەیاندووە کە من ئەندامێکی نیشتیمانی و شۆڕشگێڕی هەموو توانایەکم هەیە لە ڕووی فیکری و ژیری و جێبەجێکردنەوە بۆ بەرەوپێشبردنی ئامانج و بەرژەوەندییەکانی سیستم و شۆڕش”.
هەروەها بەڵێنیشیدا بە دۆزینەوەی کەشێکی ئەرێنی بۆ لێکتێگەیشتن و کۆدەنگی و لێکتێگەیشتنی نیشتیمانی و کەشی گفتوگۆ لەگەڵ جیهان لەبەر ڕۆشنایی هێز و شکۆمەندییەوە.
چاودێرانی سیاسیش پێیان وایە، دەهقان دامەزراوەی ڕابەری باڵای ئێرانی لە پشتە، بەڵام هەندێکی دیکە دەڵێن نزیکە لە هاشمی رەفسەنجانی سەرۆکی کۆچکردووی پێشووی ئێران و سەرۆکی ئێستای ئێران حەسەن ڕۆحانی ، ئەوەش بەو مانایە دێت کە باڵی موحافیزکارەکان پشتگیری ناکەن.