داوا دەکرێت شاندێکی بڕیاربەدەست سەردانی بەغدا بکات بۆ چارەسەری کێشەکان
ئەمڕۆ کۆبوونەوەیەکی هاوبەش لە نێوان بزوتنەوەی گۆڕان و یەکێتی نشتیمانی کوردستان لە دەباشان بەرێوە چوو .
لە دوای کۆتاییهاتنی کۆبوونەوەکە هەردووک لایەنی یەکێتی نشتیمانی و بزوتنەوەی گۆڕان لە راگەیاندراوێکدا ، ئەنجامی کۆبوونەوەکە رادەگەیەنن .
لە ڕاگەیاندراوەکە هاوبەشەکەیاندا هاتووە . پێویستە شاندێک لە هەرێمی کوردستانەوە سەردانی بەغدا بکات بۆ یەکلایی کردنەوەی کێشە و ناکۆکییەکانی هەمە لایەنە ، کە بڕیار بەدست بێت و پێویست نەکات بۆ بڕیاری ئەنجامی ئەو کۆبوونەوانەی بەغدا دیسان لە هەرێمی کوردستان سازشی لە سەر بکرێتەوە .
دەقی راگەیێندراوەکە:
راگەیاندراوی رۆژنامەوانی
ئەمڕۆ یەکشەمە ٢٩/١١/٢٠٢٠ کۆبوونەوەی لوتکەی یەکێتی نیشتمانی کوردستان و بزووتنەوەی گۆڕان لەدەباشان بەڕێوەچوو .
تەوەری سەرەکی کۆبوونەوەکە گفتوگۆکردن بوو ، لەسەر دواین گۆڕانکاری و پێشھاتە سیاسی و ئابوورییەکانی ھەرێم و عێراق ، بەتایبەت خراپی بژێوی ژیانی ھاوڵاتیان و مووچەخۆرانی ھەرێم ، کە بەرئەنجامی قەیرانی دارایی و بڵاوبوونەوەی ڤایرۆسی کۆرۆنا دروست بووە ، دواتریش بەدیارکراوی دوای دەرکردنی یاسای ئەنجومەنی نوێنەرانی عێراق ، پەیوەندیدار بە کورتھێنانی بودجەو وەرگرتنی قەرز قەیرانەکە قوڵتربووەتەوە .
سەڕەڕای جەختکردنەوە لەتوندوتۆڵکردنی پەیوەندی نێوان ھەردوولا، بەپێویست زانرا ھەنگاوی کرداری خێرا بۆ چارەسەرکردنی کێشەکان بنرێت، ھەروەک ھاوڕابووین لەسەر ئەم بڕیارانەی خوارەوە:
١ . بەپەلە وەفدێکی خاوەن بڕیاری حکومەتی ھەرێم پێکبھێنرێت و بچێتە بەغدا بۆ گفتوگۆکردن لەسەر چارەسەرکردنی ریشەیی و کۆتایی کێشەی بودجەو موچەی ھەرێمی کوردستان ، لەھەمانکاتدا ئەم ھەنگاوە ببێتە بناغەیەکی پتەو بۆ یاسای بودجەی ٢٠٢١ فیدڕاڵی
- پێشوازی لەھەنگاوەکانی بەرەوپێشچوونی سیستمی لامەرکەزی کارگێڕی و دارایی دەکەین ، ھەروەک لەکارنامەی کابینەی نۆیەمی حکومەتی ھەرێمدا ھاتووە
- زەمینەخۆشکردن بۆ کۆبوونەوەی لایەنە سیاسیەکانی کوردستان و پەرەپێدانی پەیوەندییەکان بە مەبەستی چارەسەرکردنی ئەو کێشانەی رووبەڕووی واقیعی ھەرێم و عێراق دەبێتەوە.
یەکێتی نیشتمانی کوردستان بزووتنەوەی گۆڕان
