دوا بڕیار لە سەر دەستپێکردنەوەی خوێندن درا
لە دوای کۆتایی هاتنی کۆبوونەوەی لیژنەی باڵای بەرەنگاربوونەوەی کۆرۆنا ، گوتەبێژی حکومەتی هەرێمی کوردستان بەشداری کۆنگرەیەکی رۆژنامەوانی کرد
جوتیار عادل، گوتەبێژى حکوومەتى هەرێمى کوردستان لەمبارەوە ڕایگەیاند : “ئەمڕۆ لە کۆبوونەوەى لیژنەى باڵای بەرەنگاربوونەوەى کۆرۆنا ، تاوتوێ بارودۆخەکەمان کرد و بڕیارماندا کە راگرتنى دەوامى خویندن لە ناوەندەکانى پەروەردە بەردەوام دەبێت تا ٧ی١ی٢٠٢١، دواى ئەوە کۆبوونەوەى دیکەى ئەو لیژنەیە بەڕێوە دەچێت و بڕیاری دیکە دەدرێت”.
هاوکات ئاماژە بەوە دەکات مەترسی لە سەر لە دەستچوونی پرۆسەی خوێندنی ئەمساڵ نییە چونکە وەزارەتی پەروەردە رێکاری گونجاوی بۆ گرتۆتە بەر .
سەبارەت بە دابەشکردنی مووچەی مووچەخۆرانیش گوتی : “بەم زووانە کۆبوونەوەى ئەنجوومەنى وەزیران ئەنجام دەدەین لەبارەى مووچە و لەوێ بڕیارى دابەشکردنى مووچە دەدرێت، هاوکاتیش وەڤدى حکومەتى هەرێمی کوردستان دەچێتە بەغدا”.
لە کۆتایی قسەکانیدا سەبارەت بە دابینکردنی ڤاکسینی کۆرۆنا دڵنیایی دەداتە هاوڵاتیان کە هەرێمی کوردستان و عێراق پێکەوە لە هەوڵی دابینکردنی ڤاکسینەکەدان و کاریشیان بۆ کردووە
