بارزانی و فواد مەعسووم باسی سەردانەكەی عەمار حەكیمیان كرد
خواكوڕك
ئەمرۆ 6ی 2ی 2017 لە سەلاحەدین مەسعود بارزانی سەرۆكی هەرێمی كوردستان پێشوازی كرد لە سەرۆككۆماری عێراق د. فواد مەعسووم، و شاندێکی یاوەری کرد.
بەپێی راگەیاندراوەكەی سەرۆكایەتی هەرێمی كوردستان كە وێنەیەكی بۆ خواكوڕك نێردراوە، سەرۆك بارزانی و د.فواد مەعسووم سەرۆك كۆماری عێراق گفتووگۆیان لەبارەی سەردانی عەمار حەکیم، سەرۆکی ئەنجومەنی باڵای ئیسلامی و هاوپەیمانیی نیشتیمانیی شیعەکان بۆ هەرێمی کوردستان‌یان کردووە.
سەرۆکی هەرێمی کوردستان و سەرۆک کۆماری عێراق بە لەبەرچاوگرتنی ھەڕەشە و دەرفەتەکان، تیشکیان خستووەتە سەر کێشە سیاسییەکانی عێراق و رۆڵی لایەنە کوردستانییەکان لە هاوکێشە سیاسییەکانی ئەو وڵاتە.
وەك لەراگەیاندراوەكەدا هاتووە، مەسعود بارزانی و فوئاد مەعسوم جگە لە باسکردنی بابەتی هەڵبژاردنەکانی عێراق، پررۆسەی سیاسیی و ناکۆکییە سیاسییەکانیان لە هەرێمی کوردستان تاوتوێ کردووە و جەختیان لە یەکڕیزیی لایەنە کوردستانییەکان وەک پێویستییەک کردووەتەوە.
