ئه‌مریكا ژماره‌ی دیبلوماسییه‌كانی له باڵیۆزخانه‌كه‌ی له به‌غدا بۆ نیوه كه‌مده‌كاته‌وه
ئەمریکا نیوەی کارمەند و دیپلۆماتکارانی لە باڵیۆزخانەی بەغدا دەکشێنێتەوە، چونکە ترسی هەیە لە ساڵیادی قاسم سولێمانی ئێران تۆڵە بکاتەوە و هێرش بکاتە سەر باڵیۆزخانەکەیان.
میدیاكانی ئه‌مەریكا ئاشكرایان كردوە، واشنتن بڕیاریداوه پێش ساڵیادی كوشتنی قاسم سوله‌یمانی فه‌رمانده‌ی فه‌یله‌قی قودسی سوپای پاسدارانی ئێرانی، نیوه‌ی فه‌رمانبه‌ران و دیپلۆماتكارانی له باڵیۆزخانه‌ی ئه‌مەریكا له به‌غدا بۆ ماوه‌یه‌كی كاتی بكشێنێته‌وه، ئه‌مه‌ش له ئه‌گه‌ری هه‌ر كاردانه‌وه و هێرشێكی ئێران.
میدیاكانی ئه‌مەریكا ئاماژەیان بەوەكردووە، ئیداره‌ی تره‌مپ پێشبینی ده‌كات، ئێران له یادی كوشتنی قاسم سوله‌یمانی، تۆڵه بكاته‌وه و هێرش بكاته سه‌ر باڵیۆزخانه‌ی ئه‌مەریكا له به‌غدا.
له ٣ی ١ی ٢٠٢٠، قاسم سوله‌یمانی فه‌رمانده‌ی فه‌یله‌قی قودسی سوپای پاسدارانی ئێران له بۆردومانێكی ئاسمانی سوپای ئه‌مەریكا له نزیك فڕۆكەخانەی به‌غدا كوژرا.
