شاندێكی سیاسیی هەرێمی كوردستان سەردانی بەغدا دەكات
سەرۆكی نوێنەرایەتی حكوومەتی هەرێمی كوردستان لە بەغدا رای دەگەیەنێت، بڕیارە لە سەرەتای ساڵی نوێدا شاندێكی سیاسیی بە سەرۆكایەتی سەرۆكی هەرێمی كوردستان سەردانی بەغدا بكات.
ئەمڕۆ سێشەم ٢٩ی ١٢ی ٢٠٢٠، فارس عیسا بەرپرسی نووسینگەی نوێنەرایەتی حكوومەتی هەرێمی كوردستان لە بەغدا، بە میدیاكانی ڕاگەیاند، بڕیار بوو پێش كۆتایی ئەمساڵ شاندێكی سیاسیی هەرێمی كوردستان سەردانی بەغدا بكات، بەڵام وادەی ئەو سەردانە گۆڕا، بڕیارە لە سەرەتای ساڵی نوێدا ئەو سەردانە بکرێت.
زیاتر گوتی، سەردانەكە بە سەرۆكایەتیی نێچرڤان بارزانی سەرۆكی هەرێمی كوردستان دەبێت و بڕیاریشە نوێنەری هەموو لایەن و حزبە سیاسییەكانی هەرێمی كوردستان لە شاندەكە هەبن.
باسی لەوەش كردووە، سەردانەكەی سەرۆكی هەرێمی كوردستان بۆ بەغدا لە چوارچێوەی هەوڵەكانی پتەوكردنی پێوەندییەكانی نێوان بەغدا و هەولێر و برەودانە بەو لێكتێگەیشتن و رێككەوتنەی كە لە چەند رۆژی رابردوودا لە نێوان شاندی هەردوولا لە بەغدا ئەنجام درا.
دوای چوونی شاندی حكوومەتی هەرێمی كوردستان و مانەوەیان بۆ ١٥ ڕۆژ، دواجار ڕێككەوتن لەسەر پشكی هەرێمی كوردستان لە بودجەی ساڵی ٢٠٢١ كرا، چاوەڕوان دەكرێت لە ئەنجوومەنی نوێنەرانیش دەنگی پێ بدرێت.
