سەنتەرێكی توێژینەوەی ئەمریكی: دوای داعش عێراق بەرەو وێرانیەكی تر هەنگاو دەنێت
خواكوڕك
سەنتەری توێژینەوەی شەڕ لە واشنتن راپۆرتێکی دەربارەی رەوشی عێراق بڵاوکردووەتەوە تێیدا ئومێدی خەلكی عێراق دوای داعش دوورتر دەخاتەوە، وەك لە راپۆرتەكەدا هاتووە ئامانجی سەرەکی هاوپەیمانێتی نێودەوڵەتی دژ بە داعش تێکشکاندنی رێکخراوەکەیە نەک چارەسەرکردنی ئەو قەیرانە سیاسییەی لە عێراق زەمینەی بۆ سەرهەڵدانی داعش رەخساند. هەربۆیە مانەوەی کێشە سیاسییەکان واتای ئەوەیە دەکرێت دوای داعش چەندین گرووپی دیکەی چەکدار دەربکەون یان ئەو گرووپانەی دیکە بەهێز ببنەوە کە پێش داعش لە عێراقدا هەبوون.
هەر لە راپۆرتەكەدا رێكخراوە سەنتەرە توێژینەوەكە ئاماژە بەوە داوە، كە بەدەیان گروپی تر ئێستا لەناوچە سوونە نشینەكان هەن و و دەیانەوێت پاش تێكشكاندنی داعش سەر دەربهێنەوە، خۆیان بەهێزتر بكەن، وە ك لە راپۆرتەكە دا هاتووە گرووپی نەقشبەندییەکان و یەکەی شۆڕشی هەزار و نۆسەد و بیستەکان. لەوەش زیاتر، چەند بەرپرسێکی بەعسیەکان سەرۆکایەتی شانەکانی داعش لە پارێزگای کەرکووک دەکەن ئەمانە خۆیان مەلاس داوە بۆ پاش داعش و قۆناغێكی تر لەشەڕ دژی دەسەڵاتی شیعەی عێراق”.
سەنتەری توێژینەوەكە ئاماژە بەوەشداوە، كە پێش هاتنی داعش سوپا هەبوو ئینجا داعشی لەناو ناوچە سوونە نشینەكان دروست كرد، لەئێستادا عێراق سوپایەكی تائیفی و دەمارگیری هەیە بۆیە هەموو زەمینەیەكی لەبار لەناوچە سوونە نشینەكان هەیە كە تێیدا قاعیدە و گروپەكانی تر گەشە بكەن، ئەم دەرفەتەش بۆ قاعیدە زۆر لەبار ترە لەگروپەكانی تر”.
لە راپۆرتەكەدا ئەوەش ئاشكرا كراوە، کۆنتڕۆڵکردنەوەی موسڵ و شوێنەکانی دیکە بە واتای بنبڕکردنی داعش نایەت، چونکە لەو کاتەوەی ئۆپەراسیۆنی کۆنتڕۆڵکردنەوەی موسڵ دەستی پێکردووە داعش چەندین تەقینەوەی لە بەغدا و شارەکانی دیکەی عێراق ئەنجامداوە. کەواتە ئەو رێکخراوە دەتوانێت سرووشتی هێرشەکانی بگۆڕێت و بەو شێوەیەش هەڕەشەکانی بەردەوام بن.
لە کۆتایی راپۆرتەکەدا هاتووە، میلیشیا شیعەکان پێگەیان لە بەهێزبووندایە و حەیدەر عەبادی، سەرۆکوەزیرانیش لە ژێر گوشارێکی گەورەدایە و ناتوانێت ئۆپەراسیۆن و چالاکییەکانی حەشدی شەعبی رابگرێت. ئەمەش واتای ئەوەیە دەکرێت لەگەڵ تێپەڕبوونی هەر رۆژێکدا جیاوازیە تائیفیەکان لە عێراقدا زیاتر قوڵ ببنەوە.
