جوتیار عادل: حکومەتی هەرێم هیچ بیانویەکی بۆ بەغدا نەهێشتۆتەوە کە بەشە بودجەی هەرێم نەنێرێت
![](https://xwakurk.com/wp-content/uploads/2020/09/118897234_3331721120246938_2435758981808269767_n-5.jpg)
بەبۆنەی هاتنەوەی ساڵی نوێ گوتەبێژی حکوومەتی هەرێمی کوردستان پەیامێکی بڵاوکردەوەو لە پەیامەکەی گوتەبێژی حکومەتی هەرێمدا هاتووە هەرێمی کوردستان هیچ بیانوویەکی بۆ نەناردنی بەشە بودجەی هەرێم و جێگیرکردنی لە یاسای بودجەی فیدراڵی نەهێشتووەتەوە.
جووتیار عادل، گوتەبێژی حکوومەتی هەرێمی کوردستان لە پەیامێکدا بەبۆنەی هاتنی ساڵی نوێی 2021، پەیامێکی پیرۆزبای بڵاوکردەوە لە پەیامەکەدا هاتووە: پیرۆزبایی لە سەرجەم هاووڵاتیان و خانەوادەی سەربەرزی شەهیدان دەکەین. هیوادارین لە ساڵی نوێدا، ئاشتی و ئارامییەکی زیاتر بۆ وڵاتەکەمان بەدی بێت و کۆتایی بە قەیرانەکان بێت”.
هەروەها گوتەبێژی حکومەتی هەرێمی کوردستان لە بەشێکی دیکەی پەیامەکەیدا رایگەیاندووە : “حکوومەتی هەرێمی کوردستان هەموو تواناییەکانی خۆی بۆ چارەسەرکردنی قەیرانەکان و پێشخستنی پرۆسەی چاکسازی و خزمەتکردنی هاووڵاتیان لە هەموو بوارێکی ژیان خستووەتە گەڕ.
هەروەها جوتیار عادل گوتوشیەتی: حکومەتی هەرێمی کوردستان هیچ بیانوویەکیش بۆ نەناردنی بەشە بودجەی هەرێم و جێگیرکردنی لە یاسای بودجەی فیدراڵی نەهێشتووەتەوە”.